Shillong, Nailur 23: Ka khubor ba la ïoh na ki pulit la ïathuh ba palat 400 ngut ki ehrang ka National Liberation Front of Tripura (NLFT) bad ka All Tripura Tiger Force (ATTF) shen kin sa wan ban pyndep wait ban aiti ïa ki tiar siat ha ka jingalang ban long shen ha ka jylla.
Katkum ka khubor la ong ba ki ehrang ka NLFT bad ATTF ki la ïasoi ïa ka soskular ïasuk bad ka sorkar pdeng bad ka sorkar Tripura ha Delhi ha ka 4 tarik Nailur ha ka jingïadonlang u Myntri kam Poh ïing ka sorkar pdeng u Amit Shah, u Myntri Rangbah ka jylla Tripura u Manik Saha, kiwei kiwei ki nongïalam saiñ pyrthei bad ki ophisar ka tnad kam Pohïing (MHA) bad ka sorkar Tripura.
Shuh shuh ka khubor ka la ong ba uwei na ki sorkar ka Tripura u la ïathuh ba palat 400 ngut ki ehrang NLFT bad ATTF kin wan pyndem noh ïa ki tiar ïaleh ha kawei ka ktem jong ki shipai Tripura State Rifles (TSR) ha Jampuijala, kaba don ha Sepahijala district jong ka thaiñ sepngi ka Tripura.
“Katkum ka jingïateh, ki nongïalam jong ka NLFT bad ATTF ki la mynjur ban iehnoh ïa ka lynti jong ka jingkieng atiar, ban aiti lut ïa ki tiar ïaleh bad ki kuli jong ki, bad ban pynduh noh ïa ki seng jong ki,” ong ka khubor na ka sorkar kane ka jylla.
La ong ba ki ehrang NLFT bad ATTF kiba wan pyndem wait kin ïoh T.6,000 shi bnai na ka bynta lai snem bad ïa kine ki ehrang yn ailad bad jingïarap ba kin ïohkam, la ka dei ha ka rep ka riang, ka ri dohkha bad kiwei kiwei.
