Shillong, Nailur 23: Ki jingïakhun quarterfinal ha ka lympung phutbol kyrdan Third Division 2024 jong ka Shillong Sports Association kin sdang naduh mynta ka Sngi Hat Majai ban ruh ha ka Sngi Balang.
Ka prokram ïakhun la ïoh ban pyllait ha ka Lah Sngi U Blei, ha kaba ki bor pynïaid ka SSA ki la pynthikna ba ka Umpling SC bad ka Mawkriah West SC ki dei ki kynhun kiba la rung na ka thup jong ka Group C.
Kumba ka paw ha kane ka Group ki la don lai tylli ki kynhun ba ïaryngkat da mar 9 point bad ruh kiba ryngkat ka jingïapher kol. Hynrei ka Umpling ka la ïoh rung nyngkong katkum ka jingbun kol ba ka la thep (11 kol) hynrei ka Mawkriah West bad ka Lawmali SC ki long mar katjuh.
Kumta ïa ka kynhun ban shim ïa ka kyrdan ba ar la rai da kaba shu kynting pisa (toss), kaba la leh ha khmat ki nongmihkhmat jong baroh ar tylli ki kynhun.
ïa ki jingïakhun quarterfinal yn pynlong ha ki ar sngi lynter, ha kaba yn pyndep ar tylli ki jingïalehkai ha ka shi sngi.
Ki jingïalehkai ha kane ka Sngi Hat Majai yn sakhi ïa ka lahduh jong ka Group A , ka Mawryngkneng SC ka ban aireng ïa ka kynhun kyrdan ba ar jong ka Group B, ka Lumparing SC, ha ka por 12:15 baje mynsngi. Hadien kane, bud sa ka jingïakhun hapdeng ka lahduh jong ka Group B – ka Mawpat SC pyrshah ïa ka kynhun ba wan ba ar na ka Group A – ka Kharang SC.
Ka Umpling kaba long ka lahduh na ka Group-C kan ïatynjuhbor pyrshah ïa ka kynhun ba bat kyrdan ba ar na ka Group D – ka Sanmer ha ka por 12:15 baje mynsngi la sngi Balang, bud sa ka jingïalehkai hapdeng ka lahduh jong ka Group D – ka Tynring SC pyrshah ïa ka Mawkriah West. Baroh ki jingïalehkai yn pynlong ha SSA Ground, Polo.
Ka Semi final kan long ha ka 28 tarik Nailur, katba ka final ha ka 2 tarik Risaw.
