Nongstoiñ, Jylliew 1: Ha kum kane ka juk kaba mynta kaba dei ka juk ïa beh rongphong, kham ñiar eh ban shem ïa ki samla kiba trei ïa ki kam kamai jakpoh barit baria, kum ka kam bylla da kaba kit daju kaba bun hi ki ñiew ruh kum ka kam kaba rit bad kaba poh. Hynrei, ka long pat kaba sngew tynnad ba uwei u samla u ba dang pule ha ka klas kaba 12, u la trei shitom ban bteng jingpule da kaba bylla kit daju ha iew Nongstoiñ.
Une u samla u dei u Kitbor Nongdom 20 snem ka karta, khun jong I kong Batalin Nongdom bad ki shong ki sah ha ka shnong Pyndenglawar Nongstoiñ West Khasi Hills District. Kumba long mynta u dang pule ha ka klas kaba 12 ha KJP Synod College Nongstoiñ bad u don 8 ngut shipara bad u dei ruh u khun uba nyngkong na ki shi para.
Haba ïa kren bad u nongthoh khubor u la ong, “Ngam ju kyntu ïa ki lok ban ong trei shitom trei shitom, hynrei barabor nga ong beit trei hok. Namar lada ngi ong trei shitom kaba mut ngi lah bakla, namar wat u nongtuh ruh u trei shitom”, ong u ne u samla u ba kyrshan skul ïalade da kaba u kit daju mynstep bad janmiet.
U la ïathuh ruh ba mynstep ha ka por 6 baje ei ei u lah poi ha sor Nongstoiñ bad naduh mynstep hi u bylla da kaba kit daju haduh 9 baje ei ei. Hadien kata u leit klas pat mynsngi bad hadien ba la wai klas ruh u leit biang sha ka jingbylla kit daju. Da kane ka rukom im, u lah ban pyndap ïalade ha ka jingleit pule bad wat ha ïing ha sem ruh kumjuh.
Une u samla u la ong ba ka jingleit kit daju jong u kam dei kaba la pynbor da mano re mano ruh. Hynrei ka dei ka mon sngewbha jong u ban bylla haba ïoh por da kaba tyngkai khlem da pynsepei ïa ka. U la pynpaw ba u don shisha ruh ka jingthrang ban kiew shakhmat ha ka pule puthi ryngkat ka jingtrei shitom, khnang bad kiew shaphrang ha ka jingim.
