Shillong, Jylliew : U MLA ka Mawlai u Bah PT Sawkmie ha ka sngi Balang ba la lah u la noh synñiang 15 lak tyngka sha ki skul bad sha ka jaka sah jong ki samla kiba la kyrni ïa ki jingdih kiba sniew.
Na kane ka 15 lak tyngka, T.5 lak la ai na ka bynta ki jingdonkam jong ka skul Church of God (Ecclesia), Higher Secondary School, Mawlai Nongkwar, T. 5 lak da ka Mawtawar Presbyterian Secondary School bad T. 5 lak sha ka Newlife de Addiction Centre, Mawlai Mawtawar, jong ka Khasi Jaiñtia Synod Sepngi Urban Mission.
Ha ka jingïalang ba la long ha Church of God HSS u MLA u la aiti ïa ka work order na ka bynta ki project bapher jong ka skul ha ka principal kong Shakila Jana ha ka jingdon ryngkat u President, ki dkhot ka Managing Committee bad ki khynnah skul.
Katba ha Mawtawar Presbyterian SS u MLA u la aiti ïa ka Work Order na ka bynta ban shna pynïar ïa ka kamra klas ha ka Principal Kong V. Langstieh, ha ka jingdon ryngkat u tymmenbasan bad president ka managing Committee bah S. D Kharumnuid, pastor P. Kharumlong, uba long ruh u secretary ka Managing Committee bad ki nonghikai.
Shuh shuh ha Newlife De Addiction Centre pat u la aiti ïa ka work order na ka bynta ka jingtei ïa ka jaka sah ki samla kiba shah sumar na ki jingdih basniew kum u drok, ka kiad bad kiwei ki jingsniew ha Mawlai Mawroh ha u Director ka KJP Synod Sepngi Urban Mission pastor MM Iangrai, ha ka jingdon ryngkat u pastor L. Nongrud, pastor RT Shangdiar, ki samla bad kiwei.
Ha kane ka sngi u Bah PT Sawkmie u la ïoh ruh ban pyllait ïa ka website jong ka Church Of God Higher Secondary School.Haba ai jingkren ha baroh lai tylli ki jingïalang u Bah Sawkmie u la pynpaw ba kine ki jingai ki long ban don bynta lang bad ki kam jong ki.
Na ka liang ki nongpynïaid skul bad jong ka Newlife De addiction centre ki la ai khublei bad pynpaw ia ka jingsngewnguh ha ka ba ïa dei bad kine ki jingïarap jong u MLA.Haba ai khublei bad pynpaw ka jingsngewnguh u pastor L. Nongrud u la pynpaw ba kim pat ïoh MLA kum u Bah PT Sawkmie, uba sngewthuh bha ïa ka eh ka shon ki paidbah, bad ki don ki bynta ba ym ju donkam ban ong, hynrei u la sngewthuh kumno ban ai hi khlem da donkam ban pan ne pyntip sha u.
Shuh shuh na ka liang u pastor u la ong ruh ba ka shnong Mawlai ka donbok palat ba ïoh ïa u MLA kum u bah PT Sawkmie bad ki kyrmen ruh ba un dang ïai bteng wat hadien u 2023.