Mawkyrwat, Jylliew 02: Katba nangmih ki sngi ki por kiba bun ki samla ki la sdang ban mih ban pynpaw pyrthei ïa la ki jong ki sap ki phong ba ki ki don la ha kano kano ka bynta kaba U Blei hi U la buh ha ka jingim jong ngi ki briew bad kane mynta paw ha uwei na ki samla jong ka thaiñ Mawkyrwat ha kaba u la shah jied ban leit ïa shimbynta ha ka Khelo India ha ka jingïakop jngi-um ha Nongbah Haryana.
Lah ban kdew ba ka jylla Meghalaya ka la ïoh ban sei ïa ar ngut ki ban sa mih khmat ïa ka jylla ban leit ïa shimbynta ha kane ka Khelo India ka ban sa long shen ha Nongbah Haryana bad kita ki long u samla Khrawkupar Lyngdoh uba dei na South West Khasi Hills District bad ka samla Merry June Syngwan na Shella, East Khasi Hills District.
Ka jingïoh ban mihkhmat jong ki ka la long ka jingaimynsiem na ka bynta ki para samla kiba don ka mynsiem ban kyntiew ïa lade ha ki kam ïalehkai bad lyngba jong ki kan sa long ruh ka nuksa kaba bha ba dei da ka jingtreishitom jong ki ba ki sa poi haduh kane ka bynta. Kumta lyngba kine ki ar ngut ki samla kan sa kyrsiew thiah ïa kiwei de ba la ki don ka sap ha kano kano ka bynta kim dei ban pynleh noh ei hynrei ki dei ban pyndonkam hok ïa ka khnang ba kan long ka jingmyntoi na ka bynta ka lawei ne ha ki sngi ki ban sa wan.
Ha ka jingïalang ba lyngkot ba la pynlong mynta ka sngi ka 2 tarik u Jylliew, 2022 la ïoh ka jingkren ba lyngkot na u bah Stalyne H. Diengdoh uba dei u President jong ka South West Khasi Hills District Swimming Association ha kaba u la pynpaw ka jingaikhublei kaba kyrpang eh na ka bynta u samla Khrawkupar Lyngdoh uba la long uwei na ki samla uba la shah jied ban leit ïa shimbynta ha ka Khelo India ha Nongbah Haryana ha ka jingïakop Jngi-um bad kane ka long shisha ka jingsarong na ka bynta ka dong ka thaiñ ka distrik bad ka jylla hi baroh kawei ba ka la ïoh ban sei ïa ki samla kiba pyndonkam hok ïa ka sap ba ki ki don.
“Ka jingkhmih lynti ban jop khlem da don ka jingtrei shitom kata kan nym lah ban long”, u la ong bad watla kum ki nongjngi-um kim da don ïa kata ka jaka kaba biang ban kilanmet hynrei ki don pat ïa Phot Umnew kaba long ka jaka jngi ba la don lypa naduh ki por kiba mynshwa ha kaba na kane ka wah kum ka association ka la ïoh ban sei ïa shibun ki rang’ bad ki ‘thei kynsai kiba la mih khmat ïa ka distrik ha ki jingïakop jing-um kiba la wanrah shibun ki khusnam ha kine ki snem kiba la dep bad wat ha kane ka Meghalaya Games 2022 kaba dang shu dep shen ruh.
Namarkata, u pynkynmaw biang na ka bynta ki khynnah samla ba ka jingtreishitom, ka jinglong ryntih, ka jingsumar ïa ka met ka phat bad ka mynsiem jong ka jingsngewrit ki long ka nuksa kaba bha bad ka pynkiew kyrdan ïa u ne ka briew namar bunsien hi haba la kiew bad jop ha kiba bun ki bynta ka jingsarong ka don beit hynrei wat ai lad ïa kata bad kynmaw ba ka jingsarong ka wanrah pynban ïa ka jingjot, ong u bah Diengdoh.
Ha kane ka sngi la donlang ruh ki nongïa jngi-um ki ban sa leit ïa shimbynta ha ka Trial kata Sub – Junior bad Junior na ka bynta ban jied ïa ki bad lada ki shah jied kin sa leit ïa shimbynta ha ka lympung ïalehkai ha Nongbah Orissa ka ban sa long shen.
