Nongstoiñ, Jylliew 2: Satang ar sngi ka jingrakhe ïa ka sngi pynneh mariang ha shityllup ka pyrthei ka la poi, hynrei haba phai sha ki paitbah ka jylla jong ngi, haduh mynta tang khyndiat eh ki nongshong shnong kiba la sdang ban sngewthuh ïa ka jingkordor jong ka mariang bad ki khlaw ki btap da kaba trei shitom bad ïaleh katba lah ba thung da ki dieng ha sawdong jong ki kper ki phrah.
Haba phai ha katei ka bynta ym lah ban len ba ka sorkar ka la ju pynshlur ïa ki paitbah ba kin pynneh pynsah ïa ka jingjyrngam, da kaba thung dieng man la u snem ha ka sngi rakhe ïa ka World Environment day bad ka la bei pisa ruh lyngba ka skhim MNREGS, ba baroh ki Area Employment Council bad ki Village Employment Council ha ki shnong bapher bap her jong baroh ki District kin thung dieng.
Ha kaba ïadei bad katei ka sngi la lap ba baroh ki Balang ki ju rakhe kyrpang, hynrei kaba lyngngoh ka long ba ka shu kut tang ha ka jingrakhe hapoh ïingmane. Hynrei ym shym la ïohi ba ki don kiba sngewkhia da kaba trei shitom ban thung dieng na ka bynta ban pynneh ïa ka jingjyrngam. Haba phai ha man la ki jaka ha poh ka District la lap ba ki don tang khyndiat ngut ki briew kiba la sngewthuh bad burom ïa ka mariang, da kaba thung da ki dieng ha baroh sawdong jong ki kper jong ki.
Nalor nangta, la lap ba ka jinglong jingman jong ka West Khasi Hills ha kine ki sngi, la lap ba ka jingpom pathar ïa ki khlaw ka jur bha. Hynrei ki don pat ki khwan myntoi kiba kren ksan ba lada pom ïa ki khlaw tang hadien shi snem ar snem ki khlaw ki la rben biang. Katei ka jingong jong ki ka dei tang ka jingkren kut lad namar lada ki sangeh ban pom dieng ka pla ka la thylli.
