Shillong, Nailur 17 : Ki paid ieid phutbol jong ka Jylla kin sakhi bun ngut bha ki rangïalehkai Khasi kiban mih madan na ki klob bapher bapher ha kane ka lympung ïalehkai phutbol ba heh tam ha ka Ri ka Indian Super League kaba la ïaid mynta shaid shaid.
Da kaba sdang shwa na ka North East United FC, ka kynhun kaba la ïoh ruh ban rah ïa ka nam lahduh ha ka lympung ïalehkai Durand Cup kaba dang shu lah shen, kane ka kynhun ka la bteng ban pynneh ïa u rangïalehkai shakhmat u Redeem Tlang, 29 snem ka rta, hapoh ka jingïalam jong u Juan Benali kum u coach.
Une u rangïalehkai hadien ba u la mih na ka FC Goa ban pynïasoh sha ka NeUFC u la ïoh ban mihkhmat haduh 29 tylli ki jingïakhun bad ïoh ruh ban thep haduh saw tylli ki kol nalor ba u ïoh ruh ban ïarap pashat bol haduh arsien ban thep kol.
Na ka liang ka Punjab FC pat ka la shim haduh arngut ki samla Khasi ha kane ka samoi mynta u snem hapoh ka jingïalam jong u Panagiotis Dilmperis kum u Coach.
Kine ki rangïalehkai ki kynthup ïa u Samuel James Lyngdoh Kynshi, 24 snem uba dei u rangïalehkai shakhmat bad uwei pat u dei u samla Ricky John Shabong 21 snem uba dei u rangïalehkai pdeng madan.
Haba phai sha u samla Samuel Lyngdoh, une u rangïalehkai u la ïoh ban mih madan haduh san sien na ka Punjab ha kane ka samoi ba la dep. Ha shwa ba un pynïasoh sha ka Punjab ha u 2023, u Samuel u la ïoh ruh ban mih madan haduh 43 sien an ka Real Kashmir da kaba ïoh ban thep 6 kol bad ïarap pashat bol haduh 6 sien ban ïoh thep kol.
Nalor kine, ka Kerala Blasters ruh ka don uwei u samla Khasi u Aibanbha Kupar Dohling 28 snem uba dei ruh u rangap dien ba kynsai ha ki lympung ïalehkai ISL.
Une u rangïalehkai u la pynïasoh bad ka Kerala ha u Nailar 2023 na ka FC Goa kaba u la ïoh ban mihkhmat haduh 44 sien bad ïoh ruh ban thep ar tylli ki kol.
Mynta ka kynti, sa uwei pat u rangïalehkai ba dang khie, u Halen Nongtdu 20 snem ka rta u la ïoh lad ban donlang bad ka kynhun ba pawnam ka lympung ka Mumbai City mynta ka samoi kum u rang apdien.
Kane kan dei ruh ka lympung ïakhun kaba nyngkong eh na bynta u Nongtdu ban ïoh mih madan ha ka lympung ISL hadien ba u khlem ïohlad satïa ban mih madan ha ka samoi ba la dep.
Ka jingïakhun jong ka Mumbai City kan long pyrshah ïa ka Jamshedpur ha ka 21tarik mynta u bnai.
