Shillong, Nailur 16: Wat la ka sorkar ka la shim ïa ka sien jam kaba kham tyngeh ban shna pynbha ïa ki ïing skul sha ki nongkyndong, hynrei ka jingthmu ban pynbha da ka sorkar kam pat ïa kot.
Halor kane na ka liang uwe na ki nongtrei mon sngewbha u bym kwah ban pynpaw kyrteng u la ong ba ha kylleng ki bynta jong ka thaiñ ha Garo Hills ki don shibun bah ki ïing skul kiba la jot rathai ha kaba ki khynnah skul ki shem shitom ban leit skul ha por slap namar kim don shuh wat ki ki tnum ïing jong ki skul.
Kane ka jingjot palat jong ki skul ka la pynlong ruh ïa ki nonghikai ba kin nym poi thikna sha ki kam hikai namar ki kamra ki la jaw beit da ka um kumta ka la shem jingeh ïa ki ban hikai skul khamtam haba wan ka por slap, kum kine ki jingjia ki jia kylleng ka Rilum Garo.
Ka jingjot jong ki ïing skul kam dei kaba jia tang mynta kine kila jia bun bun snem hynrei na ka liang jong ka sorkar jylla ka la shu ieh kumto ïa kine ki skul bad kane ka la dang pynsniew dur shuh shuh ïa ka pule puthi ha kane ka jylla.
Ban pynkynmaw ba na ka liang jong u Myntri Rangbah ka jylla u la dep ban kren paidbah ba ka sorkar mynta ka shna ne pynbha ïa ki ïing skul sha ki nongkyndong bad haduh mynta na ki palat hajar tylli ki ïing skul kiba la jot dang lah ban pyndep kumba 200 tylli bad kiba dang shna kumba 500 tylli tam ne duna.
