Lap ka Assembly Environmental Committee ba duna ki kam pynneh mariang jong ki karkhana dewbilat ha EJHD

Khliehriat Nailur 13: Ka kynhun jong ka Assembly Environmental Committee jong ka sorkar Meghalaya ba la lamkhmat da u Chairman, u Bah Wailadmiki Shylla, uba dei u MLA jong ka Jowai, ha ryngkat ki heh sorkar mynta ka sngi ki la hiar jurip ïa ki jaka tih mawshun jong ki company dewbilat bad jurip ruh ïa ki karkhana saiñ dewïong ne Coke plant bad la buddien ruh ïa ka rukom treikam ki company dewbilat ha kaba ïadei bad ka jingpynneh pynsah ne ïada ïa ka mariang.
Ha ka jingïalang ba la pynlong ha Star Cement, ka Committee ka la lap ruh lyngba ki jingbatai ne presentation ba la pynbit pynbiang da ki hynñiew tylli ki company dewbilat ba la pyni ruh lyngba ka projector, ba watla ki don bun bha ki kam kiba la ïarap shikatdei eh ïa ka imlang ka sahlang ha ka thaiñ hynrei ka don pat ka jingduna kaba bun bha ha ki kam kiba na ka tnat CSR ha kaba ïadei bad ka jingpynneh pynsah ïa ka mariang, kumta halor kane ki heh jong ka Committee ki kyntu jur ïa ki trai karkhana ba ki dei ban shim khia bha ban pynbun ki kam ne ki prokram ha kaba ïadei bad ki lad ki lynti ban tei ïa ka mariang bad ruh ban pynneh pynsah ïa ka mariang.
U Chairman jong ka Committee, u la bynrap ruh ba ha ka jingjurip ïa ki company u la lap ruh ba kiba bun ki nongtrei ki dei ki bar jylla bad ki trai jylla ki duna bha, halor kane ruh u la kyntu ïa ki trai karkhana ba ki dei ban thep kam kham bun ïa ki trai jylla khamtam ki briew jong ka thaiñ.
Ki dkhot jong ka Environmental Committee mynta ka sngi ki la leit ban jurip ïa ka karkhana sai dewïong, ka Mahajong Coke LLP kaba don ha Umtyra, la jurip ruh ïa ka par mawshun jong ka company Dalmia kaba don ha shnong Thangskai bad jurip ruh ïa rukom treikam ka company Star Cement ba la ai jingbatai da ki Engineer jong ka company, hadien kane la pynlong ïa ka jingïalang ha Star Cement Company.
Ha ka jingïalang, u Bah Wailadmiki Shylla u la bynrap ruh da kaba ong, “Kum u nongshong shnong jong ka thaiñ, nga kwah ban ïohi ba kin don shibun ki nongtrei kiba na ka thaiñ ki ban trei ha ki company dewbilat, namar haba nga rung ha ki karkhana nga la sngew kumba nga don ha Assam ne ha kiwei kiwei pat ki jylla ym shuh kum ha Meghalaya namar nga ïohi tang khyndiat eh ki nongtrei kiba dei ki trai jylla ne kiba na ka thaiñ kiba trei hangne, namar kum u nongmihkhmat ki don bun ki samla wad kam kiba la wan sha nga kiba kwah kam, kiba la pass ki kyrdan baheh baheh kum ki Engineer bad kiwei kiwei, kumta nga kyrpad ïa ki trai karkhana ban pyrkhat lem ïa ki trai jylla ha ka thep kam thep jam.”
U la bthah ruh ïa ki tnat treikam jong ka sorkar kiba dei peit, kum ka tnat MSPCB ba ki dei ban pynpoi ïa ka kaiphot ha kaba ïadei bad ka jingdon ki karkhana Coke plant kiba don ha ri lum Jaiñtia bad ban pyni ruh ha ka kaiphod ïa ka jingïoh mar jong ki kum u mawshun bad kiwei kiwei, kumjuh ruh ban pynpoi ïa ki jingdon ki par mawshun kiba don ha Jaiñtia.
U MLA na Jirang, u Bah Sosthenes Sun, u kyntu ïa ki karkhana dewbilat kynthup ruh ki karkhana Coke ba ki dei ban pyndonkam shuh shuh ki kor ki bor ne ki machine ban ïada ïa ka lyer ban nym jakhlia ka lyer, haba kren shaphang ki kam jong ka CSR u la kyntu ba lada ki company ki thmu ban kyrshan ïa ki samla don sap ki dei ruh ban kyrshan ha ka rukom kaba dei, kata ban shim khia naduh ba sdang (grassroot level) ba kin kiew shakhmat ki samla, ha kaba ïadei bad ka mariang, u la ong ba ka committee ka la ïarap ïa ki company, hynrei kam dei pat ïa kiba kin pynjulor pathar ïa ka mariang, ïa ka mariang dei ba ïada bad ka dei ruh ha kajuh ka por ban kyntiew ïa ka khaïi ka pateng, u la ai khublei ïa ki Company kiba la wan ban seng kam hapoh ka jylla bad ong, “Ngi la ïoh ïa ki presentation ba ki CSR ki la leh bha ïa ka imlang ka sahlang ha kiba bun ki liang, hynrei donkam ruh ban shimkhia ruh ban ïada ïa ka mariang ban pynlong ka mariang kaba kup rong jyrngam, ba kan nym ktah ruh ïa ki paidbah kumjuh ruh ïa kiba trei hapoh ki company, ngi la ïohi ba ki don ki par bad kumno la khlong ïa u mawshun, nga kwah ban bthah ïa ka tnat Meghalaya State Pollution Control Board bad ka tnat Khlaw (Forest) ban shim khia ban wad haduh katno ka ktah bad ruh ban thaw ki lad, ki kyndon ha kaba ïadei ba ki par mawshun bad ïada ïa ka mariang.”
U MLA Nongpoh, u Bah Meralborm Syiem, u la ong ïa ki Company ba haba ki buh ïa ki ñuit bapher bapher ka dei ruh ban don ki jingmyntoi ïa ki briew ka thaiñ bad ruh ki briew jong ka jylla baroh kawei, u la bthah ruh ïa ka tnat MSPCB ban buddien ïa ka jingtreikam ki karkhana, ban wad jingtip ruh ïa ka jingïoh ïa ki mar kum u mawshun, u dewïong kumno ba ki ïoh, u la bynrap ruh da kaba ong, “Ka jingïada mariang kam dei ban long tang ha ka sngi ba rakhe ïa ka sngi ïada mariang ha ka 5 tarik jymmang, hynrei dei ban long man ka por ban ïada mariang ban thung ki dieng bad ba ki dieng ki dei ban im ha ka mariang, u la ong ruh ba ki dei ban shim khia ha kaba ïadei bad ka koit ka khiah jong ki nongtrei ha kaba ki dei ban ïoh ki jingïada kiba paka, ki medical check up ba man la ka por.
Kiba la ïa don ryngkat ha kane ka jingleit jurip ki kynthup ruh, ki ADC, East Jaiñtia Hills District, ka kong J.U.Kharpuri, MCS bad ka kong. F.Wann, MCS, u Superintendent of Police East Jaiñtia Hills District, u Giri Prasad, IPS, u heh jong ka tnat Khlaw (IFS Rtd) uba la shongthait, PCCF, u C.P Marak, ka District Forest Officer ka kong, N.Laloo, ki heh na ka tnat MSPCB, MFS , Member Secretary, u Dr. G H Chyrmang, u Environmental Engineer, u Y.F.Laloo, u Scientist, u Bah M Warbah, ki heh na ka tnat Soil East Jaiñtia Hills District, ki heh na ka that Animal Husbandary, u President Jaiñtia Hills Cement Association, u R.Pareek, Secretary, u Joshi Pawan, Tejbir Singh, Sidharrth Banerjee, Kingshok Borah, Jogi Agarwal, Sibu Das bad kiwei kiwei.