Dawa ka MMSA ban tohkit ïa ki kam u Registrar bad Director ka IIPH pyrshah ïa u DHS

Shillong, Jylliew 01:Ka Meghalaya Medical Services Association (MMSA) ka la dawa ïa ka Sorkar Jylla ban thung ïa ka jingtohkit pyrshah ïa ki kam Jong u Registrar bad ka Director ka Indian Institute of Public Health (IIPH) Shillong halor ka jingjia ba 27 tarik Jymmang bad ruh ïa ki jingkynthoh pyrshah ïa u DHS(MI) kaba pynjah burom bad ba pynhiar kyrdan ym tang ïa u DHS hynrei ïa ki Doctor ka Jylla baroh kawei.
Ka MMSA ka lah buh ïa kane ka jingdawa hynne ka sngi Balang lyngba ka dorkhas ba lah phah sha u Myntri ka Tnad ka Koit ka Khiah James P.K.Sangma bad ba lah ai copy ruh sha u Myntri Rangbah ka Jylla Conrad Kongkal Sangma, Symbud Myntri Rangbah bah Prestone Tynsong, ka Chief Secretary bad kiwei kiwei.
Ka MMSA kaba lah shong ïa ka jingïalang jong ka State Executive Committee (SEC) myn ha ka 30 tarik of Jymmang, ka la pynrem jur ïa ka rukom pynwandur ïa ka jingleit u DHS (MI) sha ka Campus barim ka NIFT myn ha ka 27 tarik Jymmang ha ki lad pathai khubor da ka Director bad Registrar ka IIPH, Shillong bad u Heh Ophisar ka Jylla.
“U DHS(MI) Dr Aman War ula shakri hok la 33 snem ha ki jaka nongkyndong bad jaka sor ka Jylla ha ki kyrdan bapher bapher tad haduh ban da poi haduh ka kyrdan Director ka Tnad ka Koit ka Khiah khlem kano kano ka jingthohbria bad barabor uba khmih bad buh hakhmat ïa ka bha ka miat ki doktor” ong ka MMSA ha ka dorkhas ba la soi da u President Dr Y.Phira bad General Secretary Dr.R Pohsnem.
Kine ki Nongïalam ka MMSA ki Ong ” Ka MMSA ka tip ba IIPH Shillong Campus ka dei ka ba lah seng ban pynkhlain ïa ki lad ai jingsumar hapoh ka Jylla bad ha ka thain Shatei Lam Mihngi ka Ri, hynrei ka rukom leh jong u Registrar bad Director ka IIPH ba pynhiar kyrdan ïa u DHS (MI) kata ruh ha ki kot khubor ka la ktah ïa ka burom jong ki doktor ka Sorkar Jylla bad kane kan nang pyntrei ïa ki lad ai jingsumar kaba long pyrshah ïa kaba ka IIPH ka ieng”.
Ha kajuh ka por, ka MMSA kala dawa ïa ka Sorkar Jylla ban khyllie bad bishar biang ïa ka Memorandum of Understanding ba la ïasoi hapdeng ka Sorkar Meghalaya bad ka Public Health Foundation of India (PHFI).
Nalor kane, ka MMSA ka pynpaw ïa ka jingkyndit bad lyngngoh ba kumno u Principal Secretary ka Tnad ka Koit ka Khiah ula shah liang Sha ka IIPH Shillong Campus, kaba dei ka institution shimet ha ka jaka ban ïada ïa u DHS(MI) uba khmih ïa baroh ki Ophisar bad ki jaka sumar ha Jylla khlem da ailad ïa u ban ïathuh ïa kaei kaba jia, khlem da kdew ïa ka jingniew bein jong u Registrar ka IIPH ïa I Project Director bad Deputy Director ka MACS.
” Kane ka pynduh mynsiem ïa baroh ki doktor ka ban sa ktah jur ïa ka jingiaid beit ïaid ryntih ki lad ai jingsumar lashai la shisngi” ong ka MMSA.
Ka MMSA ka dawa ba ka Sorkar ka dei ban tohkit ïa ki kam jong kine ki Heh ka IIPH na kaei kaba jia ha ka 27 tarik Jymmang bad ka jingkynthoh pynthohbrïa ïa u DHS(MI).
Ka MMSA ka la dawa ruh ïa ka Sorkar ban shimkhia ïa ka jingdawa jong ka Association ba ïadei bad ka jingai pyndonkam ïa ka campus barim ka NIFT haba bynrap ba dei ban kyndang noh ïa ka ophis jong IIPH, Shillong Campus na ka kamra ba la ai sha ka hapoh ka ophis jong ka Deputy Director Malaria, kaba la khapngiah lupa.
” Ka IIPH, Shillong Campus, ka la dei ban don la ka jong ka Ophis building ïa mynta namar ïa ka MoU la dep ïasoi hapdeng ka Sorkar Jylla bad ka PHFI naduh u snem 2008.
“Ka MMSA ka lah rai ruh ba kan SA shim ïa ki sienjam kiba dei ban shim lada ka Sorkar kam lah ban leh eiei ha ka ban pynbeit ïa kane ka Kam” ong ka MMSA.