Shillong, Jylliew :Lai ngut ki khynnah klas IX jong ka RKM HS School, Sohra, ki ba kynthup ïa ka Hakinidahun Suchiang, U Porchon Chakma bad U Ksh. Boris Singh lem bad 27 ngut kiwei pat ki khynnah skul na ka thaiñ Shatei lammihngi jong ka Ri India, ki la shah jied na ka bynta ka Young Scientist Programme (Yuvika 2022) jong ka Indian Space Research Organization (ISRO), ba la pynlong by the North Eastern Space Applications Centre (NESAC), Shillong.
Tang 153 ngut ki khynnah na ka Ri India baroh kawei ki la ïoh ïa kane ka kabu ksiar napdeng ki nong ïa pyrshang ki ba la palat lak, bad kumba la kdew haneng, 30 ngut ki dei na ka thain Shatei lammihngi, ha ka ba ïa ka Meghalaya la mihkhat da saw ngut ki khynnah, bad lai ngut na ki, ki dei na ka RKM HS School, Sohra.
Ka jingai jinghikai ïa ki ka la sdang ha ka 16/05/2022 bad kut pat ha ka 23/05/2022, bad ha kine ki hynñiew sngi, kine ki khynnah ki la ïoh ban khmih bad sngewthuh ïa ki jingphylla jong ka hawhaw bad ïa ki kam bad jingpyr shang ba bun jong ka ISRO. Ki la ïashim bynta ha ki seminar, ki workshop; ki la ïakhun ha ka jingkylli jingtip bad pyni ruh ïa ki project jong ki.
Ka Hakinidahun Suchiang bad lai ngut kiwei pat ki khynnah ki ba don ha kajuh ka kynhun, ki la jop ïa ka 1st prize ha ka Jingpyni Project; bad U Porchon Chakma bad U Ksh. Boris Singh ki la jop ïa ka the 3rd prize ha ka Jingkylli Jingtip. Ki la ïoh la ki jong ki khusnam kiba kynthup ïa ka memento, ka tablet, ka trophy bad ka syrnod.
Kane ka kynhun ki 30 ngut ka la leit pat sa sha Andhra Pradesh ha ka 26/05/2022 bad leit peit kyrpang ïa ka Sriharikota, kawei na ki ar tylli ki jaka pynher satellite ha ri India. Hangne ki la ïakynduh sa bad 123 ngut ki khynnah skul na kiwei pat ki bynta jong ka Ri India. La ïalam ïa ki shajan ka jaka pynher sattelite bad ki la sakhi da la ki jong ki khmat ïa ka jingsiat pynher ïa u sounding rocket. Nalor kata ki la ïoh ruh ka lad ban ïakren bad u Chairman jong ka ISRO.
