Shillong, Jylliew :Ka Seng FKJGP Nongthymmai circle kam lah khlem da pynpaw ka jingsngewsih ka ba khraw bad pynrem jur ïa ka jingjia kaba sngewsih bad ka ba sngew shyrkhei haduh katta katta ka ba la jia ha kane ka sngi ba Ar ba la lah ha ka shnong Nongrah, Shillong ha ka ba u kpa trai uba la tip kum u Joefreeson Jana u la shim noh ïa ka jingim ba lui lui jong arngut ki khun ki jong u da ka ba pyniap dusmon.
Ka seng ka ba la leit jngoh ïa kane ka longïing ka ba la mad ïa kane ka apot ka la ïaleh ruh katba lah ban ai mynsyiem bad ban pyntngen ïa kane ka longïing.
Kum ka seng ka sngew ba ym don kyntien shuh ki ba lah ban pyntngen na ka bynta kane ka longïing ha ka ba kum kane ka por. Na ka liang ka seng ka kular ruh ïa ki ba haïing hasem ba kan don ryngkat bad kane ka longïing ka ba mad ïa kane ka jingjia bad ban ïarap ruh ïa ki ha ka ban buddien ïa ka jingtohkit ki pulit ha ka ba iadei bad kane ka jingjia.
Ha kajuh ka por ka seng ka kyntu ïa ka tnat pulit ba kan shimkhia ïa kane bad ban pynngat noh ïa une u riew thrang snam ha ki kyndon aiñ ki ba tyngeh.Kane ka long katkum u kyrwoh lyngba u Wankmenlang Tariang bad Danny Nongrum, President bad General Secretary FKJGP Nongthymmai Circle.