‘Donkam ban dih ïa ka dud ka jingbam kaba biang nadong shadong’

Jowai, Jylliew 01: Ïa ka ‘World Milk Day’ la rakhe mynta ka sngi ha Jowai lyngba ka tnad Animal Husbandry & Veterinary Department Directorate Dairy Development jong ka sorkar jylla, ha ka jingïalang ba la pynlong ha Conference Hall da ka ophis u Senior Dairy Officer ka West Jaiñtia Hills District kaba don ha Mynthong, Jowai.
La rakhe ïa kane ka sngi ka long shibynta ban pynsngewthuh halor ka jingdonkam ban dih ïa Dud ha ka jingim kaba manla ka sngi namar ka duh kadei kaba jingbam kaba biang nadong shadong bad kaba ïarap ban tei ïa ka met ka phat, da kaba pynsngew ym don satia kiwei pat ki jait jingbam kiba lah ban ïoh ha ka dud kiba don lut ïa baroh ki ‘Nutrient’.
Ïa ka jingïalang ha kane ka sngi la pynïaid da u Senior Dairy Officer West Jaiñtia Hills District Jowai ma B. Dkhar, ha ka jingdanlong u kongsan bah W.K Kharbuli (MCS) Extra Assistant Commissioner ka WJH, u Dr. G. L Niang Dub-Divisional A.H & Veterinary Officer Amlarem WJH, ka Dr. E. Passah Senior A.H & Veterinary Officer Poultry Farm, Jowai, ka kong M. Shylla Dairy Officer (Quality Control) RDEC Jowai Diary Plant, Dr. I.D. Slong, Senior A.H. & Veterinary Officer, Pig Farm, Khliehtyrshi, ki nongrep kiba dei ki nongri jingri, ki khynnah skul bad kiwei de.
U Dr. G. L. Niang Dub-Divisional A.H & Veterinary Officer Amlarem haba ai jingkren ula ong ka jingrakhe ïa ka ‘World Milk Day’, kala pynkymmaw burom kumjuh ïa u Dr. Verghese Kurien bam kwai ha dwar u Blei uba long uwei na ki nongshong shnong ka Ri India uba la trei shitom met bad mynsiem ban wanrah ïa ka burom ïa ka Ri kaba lah ban pynmih buh eh ka dud hapoh ka Ri.
Kumta ula kyntu ïa ki nongri dud hapoh ka District ba kin shim ïa kane ka kam da kaba pynjanai shuh shuh ïa ka bad khamtam ban ai jingtip lem sha ki khun ki kti khnang ba ka pateng jong ki ban pynmih duh kan neh sah lashai la shisngi.
Ka kong Dr. E. Passah Senior A.H & Veterinary Officer Poultry Farm, Jowai kala ïathuh ba ïa kane ka sngi la lamkhmat da ka Food and Agriculture Organisation (FAO) jong ka United Nations ïa kaba la rakhe ha kylleng ka pyrthei, kaba batai ïa ka phang halor ka rukom ïaid lynti ha ka kam ri jingri naka bynta ka jingbha jingmiat jong ka mariang bad ka koit ka khiah bad ka lad ban pynkiew ïa ka ïoh ka kot.
Kala ong ka ba dud ka long kaba donkam bha haka met u briew namar ka pynskhem ïaki shyieng, ka Vitamin kaba don ha ka dud ka ïarap ban pynkhlaiñ ïa ka bor met (immune system), ha ka juh ka por ka dud ka lah ban pynbhabriew bad pynïoh thiah bha ha ka por miet. Kumta ka kyntu ïa ki khynnah skul ba dei ban dih ïa ka duh manla ka sngi, kala ai mynsiem ruh ïa ki nongri jingri ba ki dei ban sngew sarong ïala ka kam ba ki trei.
Katba na ka liang u kongsan bah W.K Kharbuli ula batai kyndiat shaphang ka phang jong kane ka sngi bad ula ai mynsiem ïa ki nongri masi ba ki dei ban don ka jingïatreikam lang bad ka tnad Animal Husbandry & Veterinary Department jong sorkar namar ka long kaba donkam eh ban don ka ka jngïasngewthuh jingmut na ka bynta ban pynkiew ïa ka ïoh ka kot ha baroh ki liang.
Lyngba ka jingtreikam lang jong baroh u kyrmen skhem ba kan long ka jingïohnong kaba khraw ïa ka District bad ka ri hi baroh kawei da kaba pynkut ïa ka jingkren u buh ka jingkyntu ïa ki nongri jingri ba kin wad ki lad ki lynti ban pynneh pynsah ïa kam pynmih duh pateng la pateng.
Ïa ki kyntien ai khublei la ïoh na u bah E.C Pyngrope Dairy Officer (Extension) West Jaiñtia Hills District Jowai. Ha kane ka sngi kum ka dak ban pynshlur ban dih ïa ka dud na ka liang u kongsan ula sam ruh ïa ka dud sha ki khynnah skul kiba la poi sha kane ka prokram.