Kyrshan ka UDP Mawkyrwat Circle bad ka SWKH ban ai tiket ïa u Bah Renikton Tongkhar

Shillong, Jylliew, 01: Ka United Democratic Party (UDP) Mawkyrwat Circle bad ka UDP South West Khasi Hills District ka la kyrshan pura ban ai tiket ïa u MLA ba mynta jong ka Mawkyrwat Constituency u Bah Renikton L. Tongkhar ban ïakhun na ka tiket jong ka UDP ha ka elekshon sha ka Ingdorbar Thawaiñ ka ban sa long ha u snem 2023.
U President jong ka UDP Mawkyrwat Circle u Bah Shanbor Nongsiej ha ka jingïakren bad ki lad pathai khubor ha ka sngi Balang u la ong, “nga kwah ban pynshai ha ki nongshong shnong jong ka Mawkyrwat Consti-tuency ba kam shym la don satia ka jingkhylliap lama ïa ka UDP ha Mawkyrwat Constituency. Ki paidbah kim dei ban sngewthuh bakla namarba na ka liang jong nga, kum u President ngam don jingtip eiei hynrei ka dei tang ka jingphet seng jong ki katto katne ngut ki nongkyrshan ka UDP (hapoh ka jingïalam jong u Bah Medal Sing Lyngdoh).
Kane ka jingpynshai jong ki nongïalam ka UDP Mawkyrwat Circle bad ka UDP South West Khasi Hills District ka long hadien ba u Bah Medal Sing Lyngdoh ryngkat bad ki nongbud ha ka sngi Baar ki la pynbna paidbah ba ki la khylliap lama ïa ka UDP ha Mawkyrwat Constituency. Nalor kata, ki la kam ruh ba la jan baroh ki nongkitkam jong ka UDP Mawkyrwat Circle ba kynthup ruh ïa ka Women’s Wing bad ka Youth Wing ki la iehnohkam bad mih noh na kane ka party.
Ka jingmih noh jong u Bah Medal Sing bad ki nongkyrshan jong u na ka party UDP ka dei namar ka jingbym ïoh tiket na ka UDP hadien ba ki nongïalam jong ka UDP Central Body ki la pynthikna ban ai tiket ïa u Bah Reniton Lyngdoh Tongkhar na ka bynta ka election ha u snem 2023.
“Ngin pynbna sha ki paidbah ba ngin dang ïai sah bad ngin dang ïai pynkhlaiñ shuh shuh ïa ka UDP ha Mawkyrwat Circle bad ha kine ki sngi ki ban sa wan ngin sa pdiang burom shuh shuh ïa ki hajar ngut ki nongkyrshan ki ban sa pynïasoh kum ki dkhot jong ka UDP,” ong u Bah Nongsiej.
“Ngi kyrmen skhem ba ha u snem 2023 ngin ïoh kheit ïa u soh ka jingjop, lyngba ka jingtrei shitom jong ki nongïatreilang hapoh ka party,” la bynrap u Bah Nongsiej.
Haba kylli, u Bah Nongsiej u la ong, “ka jingmih jong u Bah Medal Sing na ka party ka long ba u la tip shai ba un ym ïoh tiket satia na ka UDP.”
“Ha ka jingshisha ka UDP Mawkyrwat Circle ka la tyrwa ïa ka kyrteng jong u Bah Medal Sing Lyngdoh sha ka UDP Central Body hynrei namarba ym pat lah ban pynbna ïa ka kyrteng jong u kyrtong, pynban u Bah Medal Sing u la mih noh na ka party bad nga ruh ngam don jingtip satia. Wat ki nongïalam jong ka UDP Central Body ruh kim pat ai ktien eiei halor kane,” ula ong.
U la pynshai ruh ba haduh mynta hi ka UDP Mawkyrwat Circle haduh mynta ka dang khlaiñ bad kam shym la don satia kano kano ka jingpyndam ïa ka Women’s Wing bad Youth Wing kumba la kam da ka kynhun u Bah Medal Sing.
Na ka liang jong u nongmihkhmat ka UDP South West Khasi Hills District u Bah P. S Wanniang u la ong, “ym lah satia ban khylliap lama bad kam don hi ruh ka rul ba ki nongïalam kiba hapoh kin pynbna ban khylliap lama. Ngi ieng ban kyrshan ïa kaba ka Mawkyrwat Circle ka la pynshai ha kane ka sngi bad ngin ïaidon ryngkat ruh bad ka Circle ha u snem 2023 ngin ïoh kheit ïa u soh jong ka jingjop ha baroh ki Constituency bad kata ka dei ka thong jong ka party.”
“Ngin kyrmen ba ka UDP kan sei ïa u kyrtong ha ka elekshon 2023 bad ban pynjop donburom da ka jingtrei shitom.’ u la bynrap.