Nongstoiñ, Jylliew 1: Kum shi bynta ban wanrah ïa ka jingïalong kawei bad ka jingïasngewjan hapdeng ki para nongshong shnong naduh ki khynnah, ki samla bad ki tymmen ka Hynñiewtrep Youth Council Marskuiñ area, kan pynlong ïa ki jingïalehkai ba bun jait kum ka jingïakop siat khnam, Mawpoiñ, sohtyngkoh bad kiwei kiwei ha ka taïew ba ar jong u bnai jylliew mynta u snem.
U bah Lamphrang Dkhar uwei na ki nongïalam ka HYC Marskuiñ area haba pyntip ha u nongthoh khubor, u la ong ba ka jingthmu jong ka seng ban pynlong ïa kitei ki jingïalehkai, ka long kum shibynta ban pynkynmaw biang ïa ki paitbah, namar kitei ki jingïalehkai ki la duna bha ha kine ki sngi.
U la ong ruh ba ka jingïakop siat khnam lei lei ka dei kawei na ki jingïalehkai kiba la sdang naduh hyndai hynthai bad ka dei ruh ka jingïalehkai kaba pawnam tam jong ki long shuwa. U la pynkynmaw ba mynshuwa eh ki riew tymmen haba ki pynlong ïa ki jingïakop siat khnam, ki da kheiñ kor bha bad ha shuwa ban sdang ïa ka jingïasiat, ki da kñia ki da khriam na ka bynta ban jop ïa ka jingïathong.
Haba phai ha ki rukom siat khnam ha ki por ba mynshuwa bad ha kine ki por ba mynta ka la ïapher nadong shadong naduh ka ryntieh, ki khnam bad ki sohpdung na ka bynta ban siat. Ha ki por ba mynshuwa ki ryntieh jong ki riew tymmen, ki dei kiba la shna da ki siej ba ki la pom ha ka por kaba biang, namar ki da kheiñ ïa ka sngi ban pom ïa ka siej ban shna ïa ka ryntieh.
Nalor kata ki khnam ruh ki dei da ki khnam sop kiba la pur da ki sner pukni ym kum ki khnam ba mynta kiba la pur sner da ki kynja plastik kiba eh. Kaba kham pher eh ka dei ka sohpdung, namar ki tymmen ba mynshywa ki shna sohpdung ne skum da ki kynja phlang kiba mih ha ki kynja ktieh shrah.
Nangta na shabar pat ki sop da ki bynta ba shapoh jong u siej ba ki la dep pied ïa ka snep kaba jyrngam nalor bad ki sieh ha u dieng tylli uba rit bad ka rukom teh ïa ka skum ne ka sohpdung ruh, ki da kheiñ ïa ki lain ban khum. Ka long ruh kaba shisha ba ki tymmen ba mynshuwa, ha ka por ba ki la dep sdang ban ïasiat thong shisien ba ka nia ka jutang ka khlaiñ, kawei pat ka liang kan ym jop da leilei.
