Mawkyrwat, Jylliew 01: Ka long kaei kaei jingaimynsiem watla hapdeng ki jingduh jingkyrmen namar kiba bun ki jingeh ba kawei ka longïing ka la dep ban ïa kynduh ha kine ki snem kiba la dep baroh ha kaba ka jingduk ka la ban ïa ki bad kim don ei ei ban bam, ban dih bad khamtam eh ban shna da kawei pat ka ïing kaba thymmai.
Hynrei mynta ka sngi ka 1 tarik u Jylliew, 2022 ka la long ka jingkmen kaba khraw na ka bynta kane ka longïing namar hadien ka jingud ne pyntip lyngba ka jingwad ki lad jingïarap jong longkmie na ka kynhun ki nongñiah ar-shaka ka “The Ultimate Legend Bikers Association” (TULBA) naduh ki snem kiba la dep ha kaba ki la ïoh ban pynshna da ka ïing kaba thymmai bad ha kaba la ïoh ban ot ïa u ribon bad aiti syndon ha ka ba kan ïoh ban pyndonkam nangne shakhmat. “Ka jingdon jong ka ïingshong ïingsah ka lah ban ïarap ban da na u slap bad ka lyer”.
Hashwa ban aiti ïa kane ka ïing sha ka kong Jantina Sohlang kaba don ha ka shnong Weiloi, East Khasi Hills District la ïoh ban pynlong ka jingïalang kaba lyngkot ha kaba u Vice President ka TULBA Sawsymper Unit, u bah Jusman Lyngdoh Marshilong u la long u nongpynïaid bad ai ruh ki kyntien pdiang sngewbha. Ïa kane ka ïing ba la shna ha Shnong Weiloi ka dei lyngba ka TULBA Sawsymper Unit, ka TULBA Central Body lem bad ka jingïasnohktilang jong kiwei de ki unit bad ha i por iba lyngkot la ïoh ban pyndep.
U bah Rishan Nongrum, General Secretary ka TULBA Central Body ha ka jingkren jong u u la ïathuh ïa ki katto katne ki mat naduh ba sdang ba u la ïoh ka jingpyntip na ka kong Jantina Sohlang lyngba ka phone bad kumno ka poi haduh kane ka bynta ban pynshna syndon da ka ïing kaba thymmai watla ka long ka ïing kaba rit ruh. Ha kajuh ka por u la ïathuh ba u la pynpaw ruh ba ka jingïoh ban pynshna jong ka kynhun ki nongñiah ar shaka ïa kane ka ïing kam dei na kano kano ka skhim ne ki lad jingïarap hynrei ka dei beit lyngba ka jingïaseibor tang jong ki para dkhot jong ka kynhun, namar kum ki dkhot ki don ïa kata ka mynsiem ban leh ei ei ïa kiba donkam ka jingïarap watla ka long tang kum ka dak kaba rit eh.
Ha ka jingkren ai mynsiem pat u la ong ba kaba nyngkong eh ka dei ban ai nguh nyngkong eh ïa U Blei U ba la plie ïa kane ka lad namar ma ka hi ka la buh ki jingkyrpad lyngba ki jingduwai ba U Blei Un phah ïa kita ki nongïarap lem. “Ka jingduwai jong phi mynta ka sngi ka la long ka jubab ba U Blei na jrong U la ai ha phi ïa ka bynta lyngba ka jingïoh ïa kane ka ïing kaba thymmai ba phin shong phin sah naduh mynta ka sngi”, ong u bah Rishan.
U la ai ruh ki kyntien jingkyrkhu kyrdoh ïa kane ka longïing baroh kawei ba kan da ïoh shibun ki jingkyrkhu ha ka met bad ka mynsiem ruh bad kin ïoh ïa ki met kiba koit kiba khiah krad nangne shakhmat da ka jingri bad sumar sukher U Blei Nongbuh Nongthaw.
Haba kren pat na ka liang jong u bah Spairen Marweiñ, Rangbah Shnong Weiloi u la ai khublei kyrpang na ka bynta kane ka kynhun ki nongñiah ar-shaka ka TULBA kaba la leh ïa kum kane ka kam ba bha ha kaba ka la long pynban ka jingaimynsiem na ka bynta ki duk ki suk, ki rangli ki juki. “Ai da kane ka jingïarap jong kane ka kynhun kan ai mynsiem ruh ïa ki para briew kiba don ïa kum kane ka mynsiem ban ai lem ki lad jingïarap la ha kano kano ka bynta ruh”, ong u bah Spairen.
Ha kajuh ka por u bah Spairen u la kyntu ruh ba kane ka jingïatreilang hapoh jong ka kynhun ai ba kan dang ïai bteng nangne shakhmat ha ka ban pyntyllun ïa kiba bun ki kam, namar khlem ka jingïatreilang ne don ka jingïasngewthuh jingmut kata kam don dor ei ei ruh em.
U la pynkynmaw ruh ba ïa kum kine ki kam ba ka ka kynhun TULBA ka la leh bha ïa kiba shem jingkyrduh ka la dei ka sien kaba ar namar ha kine ar snem kiba la leit ba don ka jingkhangdam na ka daw jong u Corona Virus kane ka kynhun ka la ïoh ban leit ai jingïarap lyngba ki mar bam mar dih sha ki katto katne ki longïing kiba shem shisha ïa ki jingeh, jingkyrduh, hynrei mynta pat ka la leh da kawei pat ka kam ba bha da kaba pynshna syndon da ka ïing ha kaba ka kong Jantina Sohlang ha ryngkat ki lai ngut khun kin ïoh ban shong ban sah. “Kane ka la long shisha kaba kam kaba khraw bad ka nuksa kaba bha na ka bynta kito ki briew kiba don ka mynsiem ban leh ei ei ïa ki duk ki suk”, u la ong.
U bah Albest Lyngdoh Nonglait, President jong ka TULBA Sawsymper Unit pat u la ong ba ka jingïatylli lang jong ki dkhot ka kynhun ka la long ka daw jong ka jingjop ban pynurlong ïa kaei kaba ki ki thmu ban pyndep ha i por iba lyngkot ban shna ïa kane ka ïing khnang ba ka kong Jantina Sohlang ha ryngkat ki khun kan ïoh ban rieh tngen ban lait na u slap ka lyer. Ha ka jingkren jong u u la kyntu ruh na ka bynta ki para longkmie, ki longkpa, ki khun samla jong ka imlang ka sahlang ba kin ïapeit ïakhmih lem lada don kum kine ki briew khnang ba kin nym don hapdeng ka jingduh jingkyrmen ha ka jingim hynrei lyngba ka jingïarap jong ki da kano kano ka lad kan long pynban ka jingkyrkhu.
U bah Dislar Khar-ryngki uba kren na ka liang ka ïing ka sem u la pynpaw ka jingaikhublei kaba kyrpang na ka bynta ka kynhun ki nongñiah ar-shaka ne ka TULBA kaba leh ïa kane ka kam kaba bha na ka bynta ki duk ki suk, kiba shem jingjynjar namar mynta ka sngi kum ka kynhun ka la ïoh ban pyndep ban shna ïa kane ka ïing bad aiti noh sha ka kong Jantina Sohlang ba kan ïoh ban pyndonkam ha ka ban shong ban sah.
Ha ka jingkren jong u u la ai ruh ki kyntien jingkyrkhu kyrdoh na ka bynta kane ka kynhun ba nangne shakhmat kan nangïaid shaphrang ban pyntyllun ïa ki kam kiba bun ha kaba leh bha bad ai ki lad jingïarap na ka bynta kito ki briew kiba donkam ki jingïarap.
Kiba ïadonlang ha kane ka sngi long naduh ki dkhot jong ka TULBA Mawkyrwat Unit, TULBA Sawsymper Unit bad kumjuh ruh ki dkhot jong ka TULBA Central Body, ki katto katne ki ‘riew rangbah jong ka Shnong Weiloi lem ruh bad kiba ha ïing ha sem jong ka kong Jantina Sohlang.
