Naduh 9 tarik yn sieh lama ïong ki kali Tourist bad kali Local ba sngap kuman ka Sorkar

Shillong, Nailur 06: Ki Kynhun Seng Kali kamai kynthup ïa ki Kali Tourist bad ki Kali Local Taxi, mynta ka sngi ki la rai ban pynlong ïa ka jingteh lama ïong kaba shi taïew lynter naduh ka 9 tarik haduj ka 14 tarik mynta u bnai ha baroh kawei ka jylla kum ka dak ka jingkyrshah ïa ka jingkuman ka sorkar ban khang ïa ki kali ba nabar ban kit briew sha ki jaka jngohkai bapher bapher ha ka jylla.
Ïa kane ka rai la shim ha ka jingïalang kaba la long mynta ka sngi ha ka ïingdorbar Lumparing, Mawngap ha kaba la ïadonb lang ki President bad ki Secretary jong ki Unit bapher bapher ka Seng All Khasi Meghalaya Tourist Taxi Association bad kumjuh ruh ki nongïalam jong ka Joint Action Committee ki Local Taxi ha ka jylla.
“Ngi la rai ban sdang shuwa da kane ka jingïakhih kata da kaba the lama ïong shi taiew lynter naduh ka 9 haduh ka 14 tarik mynta u bnai ha baroh kawei ka jylla, ha kaba kumba 9 haduh 10 hajar tylli ki kali Tourist bad Kali Local Taxi kin ïashim bynta”, la ong u Bah Rocaldinus Dohling, President ka All Khasi Meghalaya Tourist Taxi Association, haba ïakren bad ki nongthoh khubor hadien ba la wai kane ka jingïalang.
U Bah Ricaldinus, u la ïathuh ba la ai bun tylli ki jingthoh bad kumjuh ruh ka jingpynkynmaw ha ka 21 tarik u bnai baladep da kaba ai por haduh ka 30 tarik une u bnai baladep sha ka ophis jong ka tnad Tourism ban ïakren biang ïa ki jingdawa jong kine ki Seng halor katei ka jingdawa, hynrei ka ophis jong u Myntri ka tnad Tourism kam shym la jubab eiei bad namar kane ka jingkuman ki bor sorkar ki trai bad ki draibar kali tourist bad local taxi ki la shim ba sdang shuwa da kane ka jingïakhih kaba jai jai.
Ha kajuh ka por ki nongïalam jong kine ki kynhun, ki la ïathuh ba na ka liang jong ki kim don satia ïa ki kali kiba wan nabar, hynrei kaei kaba ki pyrshah kadei ka jingailad jong ka sorkar ïa ki kali kiba nabar ban rung sha kylleng kylleng ki tourist spot jong ka jylla kaba la ktah shibun eh ïa ki kali kamai nangne la ka long ki tourist taxi ne ki local taxi ruh.
“Mynta la katto katne snem, ngi la shu ïoh kamai malu mala la kumno kumno tang ar sien ha ka shi taïew na kaba ngi ju ïoh jan man ka sngi ha ki por mynshuwa. Ka daw kadei namar ka jingwan ki kali tourist bad private na shabar ban rung kylleng kylleng ki jaka jong ka jylla”, ki la ong.
Namar kane ka jingbym ioh ban kamai bha, u Bah Ricaldinus, u la ïathuh ba ka la ktah shibn eh ïa ki, pynban ïa ki jingsiew sha ka sorkar, naduh ka Insurance, ka Permit, ki Khajna kiba dei naduh ki 40 hajar,50 hajar bad jan shi lam ruh katkum ka jingheh ki kali hap ban siew beit sha ki tnd treikam bapher bapher jong ka sorkar.
Ha kaba ïadei bad ka jingsieh lama ïong, u Bah Ricaldinus, u kyntu ïa baroh ki draibar ban shim ïa kane ka jingpyntip bad ban ïatreilang da kaba sieh lama ïong ha ki kalai shi taïew lynter ka ban long kum ka dak ban pynbor ïa ka sorkar ban sngap ïa ka jingdawa ki trai bad ki draibar kali tourist bad local taxi.