Shillong, Nailar 23: Ka lympung ïalehkai phutbol na bynta ki Under-14 bad 16 jong ka Meghalaya Youth League 2024 ka la nangjan ban jam sha ka wat ïakhun Quarter Final, ha kaba la jan mar shiteng ki jingïalehkai (ba pynlong man ka sngi Saitjaiñ) jong kane ka lympung la ïoh ban pyndep.
Mynta ka sngi kin don haduh 13 tylli ki jingïalehkai ban pynlong ha kylleng ka jylla na bynta ka wat ïakhun kaba hynriew (Round 6).
Na ka Zone A yn sakhi ïa ka jingïakhun ba khadduh ha ka kyrdan U-14 naba kane ka thup ka don tang 3 tylli ki kynhun ba ïashimbynta. Ka North Garo Hills District Sports Association ka la ïoh 7 point bad ka Tura District Football Association ka la ïoh khur 6 point, bad kine ar tylli kin ïakhun na bynta ka kyrdan ba nyngkong.
Ka West Jaintia District Sports Association, kaba synshar ïa ka Zone B kan nym ïakhun mynta ka sngi hynrei kiwei pat ki kynhun ba pyrshang beh ïa ka kin ïoh ban ïalehkai – ba kynthup ïa ka jingïalehkai hapdeng ka Amlarem Block Sports Association bad ka Laskein Block Sports Association, kiba shong ha ka kyrdan ba ar bad ba lai ha ka U-14 na kane ka thup.
Katba na ka Zone C kan don tang kawei ka jingïakhun, hapdeng ka Riwar Mihngi Football Association bad ka Western Ri-Bhoi Sports Association ha ka kyrdan ïalehkai U-16. Ka namjop ïa ka Riwar Mihngi FA kan kyntiew ïa ka sha ka kyrdan ba ar na kane ka thup.
Na ka Zone D yn sakhi ïa hynriew tylli ki kynhun ki ban aireng ha baroh ar tylli ki kyrdan. Ka Nongstoin District Sports Association kaba lamkhmat ha baroh ar (U-14 bad 16) kan khmihlynti ban nang pynskhem shuh ïa ka kyrdan da ka namjop.
Ka prokram ïalehkai mynta ka sngi ki long:
Zone A – U-14 (1baje mynsngi) & U-16 (3 baje nohphaisngi); Tura District Football Association pyrshah ïa ka North Garo Hills District Sport Association; ha Chandmari Artificial Ground.
Zone B – U-14 (1baje mynsngi) & U-16 (3 baje nohphaisngi); Saipung Block SA pyrshah ïa ka East Jaintia District FA; ha SBSA Football Ground.
Zone B – U-14 (1pm) & U-16 (3pm); Amlarem Block Sports Association pyrshah ïa ka Laskein Block Sports Association; ha Ladjaplem Ground.
Zone C – U-16 (3baje nohphaisngi); Riwar Mihngi Football Association pyrshah ïa ka Western Ri-Bhoi Sports Association; ha UUP Football Ground.
Zone D – U-14 (1baje mynsngi) & U-16 (3baje nohphaisngi); Tyrsad Area Sports Association pyrshah ïa ka Mawkyrwat District Sports Association; ha Mawlum Tyrsad Playground.
Zone D – U-14 (1baje mynsngi) & U-16 (3baje nohphaisngi); Mawshynrut Sports Association pyrshah ïa ka Pyndengumiong District Sports Association; ha Riangdo Playground.
Zone D – U-14 (1pm) & U-16 (3pm); Eastern Border Sport Association pyrshah ïa ka Nongstoin District Sports Association; ha Dewbyrtha Playground.
