Shillong, Nailar 23: Ka Lamlynti SC ka la ïoh ban khur pura ïa ki lai point ba kongsan hadien ba pynliem ïa ka Tynring SC da 1 – 2 kol ha ka jingïakhun kaba la long ha ka Sngi Thohdieng (23 tarik Nailar) jong ka lympung Third Division 2024 ka Shillong Sports Association ha SSA Ground, Polo.
Haba phai sha ka jingïalehkai, ka Lamlynti SC ka la ïoh ban lamkhmat lyngba ka kol u Khaiñkupar Iawphniang ha ka minit ba 9 jong ka kylla step shuwa ba u Batskhem Thongnirit un thep ïa ka kol kaba ar ha ka minit ba 37.
Na ka liang jong ka Tynring SC ka la pyrshang katba lah ban pynphai hynrei ka la ïohlad ban thep tang kawei, ba la wan lyngba u Tyngshaiñ Ryntong ha ka 61 minit. Da kane ka namjop ka Lamlynti SC ka la pynthikna ïalade kum ka kynhun ba nyngkong na ka Group-D ban jam sha ka wat ïakhun kaba bud.
Katba ha ka jingïalehkai kaba ar na ka Group-A, hapdeng ka Kharang SC bad ka Mawryngkneng SC, ka jingïalehkai ka la kut ha ka jingïakhaid da mar 2 kol.
Dei ka Mawryngkneng SC kaba la thep nyngkong lyngba u Sanlangki Marboh (34 min) hynrei ka Kharang SC ka la pynïakhaid lyngba u Justpal Kurbah (65 min) bud sa ka kol ba ar na u Willcome Pdahkasiej (75 min). Shuwa ban kut ka por u Sanlangki Marboh u la lah thep biang sa kawei ban pynïakhaid ha ka 90+1 minit.
