Shaïong ngaiñ ka East Bengal, liem da 2-1 kol ha ka Shillong Lajong

Shillong, Nailar 21: Ryngkat ka sur pyrta kaba jam na ki nongkyrshan, ka kynhun ba ïakhun hala ïing, ka Shillong Lajong FC ka la pynshaïong ngaiñ ïa ka Emami East Bengal (ka kynhun ba wan ba ar ha ka samoi ba ladep bad kaba la bat 16 sien kum ka lahduh jong ka Durand Cup), ban pynliem noh da 2-1 kol ha ka jingïakhun ïa ka quarterfinal kaba ar ha Jawaharlal Nehru Stadium, Shillong. Da kane ka namjop ka Lajong ka la buh jaka ïalade ha ka semi-final ha kane ka133rd IndianOil Durand Cup.
Ha kane ka jingïalehkai na ka Lajong la pynkhihjar da u Marcos Rudwere Silva bad u Figo Syndai katba u Nandhakumar Sekar u la pynkhih ïa ka kol na bynta ka kynhun na Kolkata.
Haba phai sha kane ka jingïalehkai, ka kynhun ba ïakhun hala ïing ka la pynkyndit ïa katei ka kynhun ba khlaiñbir na Kolkata ha ka minit kaba phra jong ka kylla step ban lamkhmat ïa ka jingïalehkai lyngba ka kol u Marcos Rudwere Silva.
Ka bol ba la pashat da u Hardy Cliff Nongbri, ka la wanpoi sbiak ha kjat u Rudwere ( u rangïalehkai na Brazil) shuwa ban pynrung jlang ïa ka bol shapoh kol kaba la pynrhem ïa ka sur pyrta ha stadium.
Hadien ba shah thep ka East Bengal ka la nang pynkhlaiñ shakhmat, da kaba ñion bad pynstet ban pashat bol hapoh phyllaw kol ka Shillong Lajong katba ka lah. Ka East Bengal ka la ïoh hi katto katne ki lad ban pynïakhaid, hynrei kine ki kabu ksiar la shah khanglad noh ha ki bak ne ha u rangapkol ka Lajong – u Manas Dubey.
Ka Emami East Bengal ka la ñion tyngeh ban ïoh pynïakhaid katba ka Lajong ka shu shañiah tylli ban ap thap ïa ki kabu ban rah kyndit kyndit ïa ka bol. Ka Kolkata kam shym la pynsepei ïa ka por bad pynstet ïa ka rukom pyntyllun bol shakhmat hynrei ki bak ka Lajong ki la lah ban ïada skhem shadien ban pynkut ïa ka kylla step da 1-0 kol.
Lah ban kdew ba ka jingïalehkai ka nang itynnat ha ka kylla miet, ha kaba baroh ar kynhun ki la trei shitom ban ïoh pynkhihjar bad don ruh katto katne ki kabu kiba la pynsmiej ïa ki rangapkol jong baroh ar liang.
Da ka jingïai pynbor ban ñion shakhmat ka East Bengal ka la ïoh ïa ka kol pynïakhaid ha ka 77 minit. Kane ka kol la pynurlong lyngba ka bol ba la pashat da u Vishnu P.K shuwa ba u Nandhakumar Sekar un pynrung jlang sha kol.
Ka jingkmen ïa ka East Bengal kam shym la neh slem naba ka Lajong ka la pynkyndit biang sa shi sien ban thep ïa ka kol kaba ar kaba dei artad ka kol jop ha kane ka jingïalehkai. Ka jingïatreilang hapdeng u Wadajied bad u Rudwere ka la plielad ïa u Figo Syndai ban pynkhih ïa katei ka kol kaba ar ha ka 83 minit kaba la pynkhyllem noh jraiñ ïa ka klob ba radbah na Kolkata ka East Bengal.