Shillong Nailar 19: Ka Joint Action Committee kaba dei ka seng jong kiba tih maw tih shyiap ne ka Stone Crushers Owners Association, Quarry owners & Workers Association ha ka sngi nyngkong ka la pynlong ïa ka jingïalang ha madan Kynton-U-Mon.
Ka kyrwoh na ka JAC la ong ba ïa kane ka jingïalang la pynlong ban shim ïa ka rai halor ka jingshem jingeh jong ki namar ka Meghalaya Mining Minerals Concession rules 2016 (MMMCR).
Ha ka jingïalang la ïashim bynta da ki spah ngut ki briew kiba la wan ban tuid ha katei ka madan wat hapdeng ka jingjur jong u slap, ban pynpaw ka jingeh jong ki na ka jingshah ktah na katei aiñ (act).
Ha ka kyrwoh khubor la ïathuh ba ha ka jingïalang la ai jingkren da u Bah Mawkordor Kharsyiemlieh uba dei u General Secretary ka seng Nongkhaïi Shyiap bad Maw, na West Khasi Hills, bad u Vice President ka JAC u Shaibor Syiem.
Ha kane ka sngi ka rai kaba mih na kane ka jingïalang paidbah ka long ba naduh ka 21 tarik Nailar ka JAC kan pynlong ka jingïakhih kaba khlem buh por lano ban pynkut, tat haduh ba ka sorkar kan sngap ïa ka jingkwah jong ka JAC, ïa kane la pynbna da u President ka JAC u Bah D Pyngrope ha ka kyrwoh khubor.
