Shillong, Nailar 19 : U Bah P.T Sawkmie, MLA barim hynne ka sngi u la ong ba ka sorkar ka dei ban shimkhia ïa ka jingeh ki nongtih shyiap bad tih maw.
“Ka long kaei kaei kaba sngewkhia ban ïohi ïa ki nongtih shyiap bad tih maw ba ki shah pyndik ha ki ophisar ka forest department,” ong u bah Sawkmie.
U la bynrap, “Ka sorkar ka dei ban tuklar shi syndon ïa kane ka kam ban bthah ïa ki ophisar ban ïarap ïa ki, ym ban khang lad khang lynti ïa ki briew ki jong ngi.”
U ong ruh, ka long kaba lyngngoh haduh katta katta ba ïa u shyiap u maw la jong, ym lah shuh ban die ban thied ha ka jylla ne ha ka District ne wat ha ki shnong ki thaw jong ngi.
Kane ka jingpynthud ki ophisar ïa ki paidbah kiba trei ïa kane ka kam ka la ktah haduh katta katta,ym tang ïa ki trai par, hynrei wat ïa ki nongbylla sngi, kumjuh ïa ki draibar bad ki trai kali.
