Ym dei ka shuki Minister hynrei ka roi ka par ha ki constituency : Dr. Celestine Lyngdoh

Shillong, Nailar 19 : U MLA ka Umsning ba dei ruh u President barim ka Meghalaya Pradesh Congress Committee (MPCC), Dr. Celestine Lyngdoh u la ong ba ka jingpynïasoh jong ki lai ngut ki MLA Congress sha ka NPP kam dei satia na ka bynta ka shuki Myntri Sorkar hynrei kaba hakhmat kadei na bynta ka roi ka pa ha ki constituency jong ki.
Haba kren bad ki lad pathai khubor hadien ba ki la dep pynïasoh pura sha ka NPP, u Dr. Celestine u la ong, “Ngi khlem dawa ban ai shuki Myntri Sorkar hynrei ngi ong beit ba ngi kwah ïa kita kita ki projek ha ki constituency jongngi kum ka C&RD Block kumjuh ki surok ba kular u Myntri Rangbah ha Mawhati, nangta nga kwah ïa ki surok bad ki projek bad Bah Gabriel ruh u kwah ïa ki surok nalor kiwei kiwei ki projek.”
Utei u MLA thymmai ka NPP na Umsning u la ong ruh ba kum ha Umsning ki don bun ki jingdonkam na ka bynta ki kam pynroi nalor ba kadei ka jaka pdeng ïa ka leit ka wan na Shillong sha Guwahati. U ong ruh ba katei ka thain ka ïahap bha na bynta ban pynbha ïa ki kam jngohkai pyrthei, ka rep ka riang, na bynta ki kam ri dohkha bad ruh ka jaka ri mrad kaba ki kwah ban pyntyllun ïa ka kam shakhmat.
Katkum ka jingong jong u, kiba bun na ki projek ba ki pynsngew hakhmat u Myntri Rangbah shwa ban pynïasoh sha ka NPP ka dei eh halor ka jingdonkam ba bun ha ki constituency khamtam ki surok, ki jaka sumar bad ka pule puthi.
Haba jubab pat halor ka jingsospon jong ka Congress da 6 snem ïa ki angut ki MLA kata ïa u Bah Charles Marngar bad Bah Gabriel Wahlang, u Dr. Celestine u la ong ba katei kam don jingktah satia. “Ka jingpynïasoh jongngi sha ka NPP kam don jingktah satia namar ïa ka jingthoh ngi la phah sha u Lamphang naduh shwa ban shah sospon,” u la ong.
Shwa kane, ki la iathuh ruh ba ki la dep ban wer lang ïa u Bah Ronnie Lyngdoh, MLA ka Congress na Mylliem hynrei ha kaba khatduh ki poi tang lai ngut. U ong ruh ba ka Congress kam dei satia ka nongshun jong ki hynrei ki sngewnguh namar ba dei na kane ka party ba ki la jop ha u snem 2023.
Ha kajuh ka por u ong ruh ba ha ka politik kan don beit ka jingkynnoh hynrei kim pynsngew ïa kata namar kitei baroh ki dei tang ki nia ha ïew ha hat.