Shillong, Nailar 18: Ki jingïakhun na bynta ka quarter-final jong ka 133rd IndianOil Durand Cup la pynbna ha ka Sngi Saitjaiñ da ka Local Organizing Committee hadien ba la pyndep ïa ka jingpynïakap (draw) jong baroh phra tylli ki kynhun ba la ïohrung sha kane ka wat. Katei ka komiti ka la shim ruh ïa ka rai khala khala ban pynkynriah ïa ka quarter-final kaba ar na Kolkata sha Shillong, hadien ba ka la sakhi ïa ka jinglong jingman ki jingïalehkai kiba la long ha kane ka nongbah. Ha ka jingïakhun ba khadduh na ka Group la sakhi ïa u paid u ba la ïamih paidbah haduh 14 hajar tam ban sakhi ïa ka Lajong kaba aireng pyrshah ïa ka FC Goa.
Baroh saw tylli ki jylla kiba ki jingïakhun Group stage ki la long kin ïoh ban pynlong ruh mar kawei ka jingïalehkai Quarter-Final jong ka 133nd IndianOil Durand Cup. Ka Quarter-Final ba nyngkong kan long ha ka 21 tarik mynta u Nailar, 2024 ha SAI Stadium, Kokrajhar (Assam) ha kaba ka Northeast United FC kan aireng pyrshah ïa ka Indian Army FT, ha ka por 4 baje nohphaisngi.
Nangta ka nongbah kaba la pynshongshit ïa kane ka lympung watla ka dei ka sien pynlong ba nyngkong ba ka ïoh bynta, kata ka Shillong (Meghalaya) kan ïoh pynlong ïa ka Quarter-Final kaba ar ha ka 21 tarik mynta u Nailar, 2024 ha Jawaharlal Nehru Stadium, ha kaba ka Shillong Lajong FC kan ïakhun pyrshah ïa ka Emami East Bengal FC, ha ka por 7 baje jan miet.
Ka Quarter-Final kaba lai kan long ha ka 23 tarik mynta u Nailar, 2024 ha JRD Tata Sports Complex (Jamshedpur) ha kaba ka Mohun Bagan Super Giant kan aireng ïa ka Punjab FC, ha ka por 4 baje nohphaisngi.
Nangta bud sa ka Quarter final kaba khadduh ha ka 23 tarik Nailar, 2024 ha Vivekananda Yuba Bharati Krirangan, (Kolkata) ha kaba ka Bengaluru FC kan ïa tynjuhbor pyrshah ïa ka Kerala Blasters FC, ha ka por 7 baje jan miet.
Hadien ba ka jingïalehkai hapdeng ka FC Goa bad ka Shillong Lajong FC na ka Group F ha Shillong ba la pynkut ha ka Sngi Saitjaiñ la ïoh ban pynthikna kino ki kynhun ban rung sha kane ka wat, bad la ïoh ban pynlong jingïalang lyngba ka video call ha kaba ki nongmihkhmat jong baroh 8 tylli ki kynhun ki la don byntalang. La ïoh ban pynlong ïa ka jingpynïakap kynhun (draw) hakhmat jong ki ha kaba ar tylli ki kynhun kin ïakhun pyrshah ha ki madan ba la dep pynthikna.
Kumban shu pynkynmaw, kane ka 133rd IndianOil Durand Cup ka la sdang naduh 27 tarik u Naitung, 2024, bad ka Final la pynkhreh ha ka 31 tarik mynta u Nailar, 2024, ha Vivekananda Yuba Bharati Krirangan. Bad ki la don haduh 24-tylli ki kynhun, kiba ïakhun mynta u snem, bad kawei ka kynhun na bar ri, na Nepal ryngkat bad 12 tylli ki klob ba ïakhun ha ka lympung ba kham heh ha India, ka Indian Super League (ISL).
