Shillong, Nailar 17: Ka Sorkar jylla ha ka sngi Saitjain ka la pyndep ia ka jingle burom kaba khatduh ïa u Myntri Rangbah barim ka jylla Meghalaya u Salseng C Marak ha Mini Stadium ha Resubelpara North Garo Hills District da ka jingpynkup burom da ka ‘State Funeral’.
Ha kane ka sng la ïalam ïa ka jingbuh syntiew da u Myntri Rangbah ka jylla u Conrad K Sangma, but sa kiwei kiwei ki nongïalam seng saiñ pyrthei, ki myntri sorkar, u MP jong ka Tura u Saleng A Sangma, u President ka MPCC u Bah Vincent H Pala MP barim ka Shillong.
Ha kane ka sngi ki nongkren ki kynthup naduh u Myntri Rangbah ka jylla, u MP jong ka Tura u Saleng A Sangma, u Dr Mukul Sangma MLA, ka Debora Ch Marak myntri barim kaba dei ruh kaba ha ïing bad kiwei kiwei ki la pyrto ïa ki kam ba ratbah kaba la nohsynniang da u Myntri Rangbah barim.
Baroh ki nongkren kila pynpaw ïa ka jingnoh synniang jong u Myntri Rangbah barim ka jylla kum u nongmihkhmat paidbah ba la jop hynriew sien sha ka ïing dorbar thawaiñ ka jylla bad kum u Myntri Rangbah ka jylla uba la pyni ïa ka jingtrei jong u ban kyntiew ïa ka jylla.
U Salseng C Marak u la long kum u Myntri Rangbah ka jylla ha u snem 1993 haduh 1998 bad u la dei u Myntri rangbah ba nyngkong ka jylla ban neh san snem ha ka shuki wat la u la ïalam ïa ka sorkar khleh khawlang.
Ha kane ka sngi ki paidbah da ki hajar ngut kila ïawan ban ïashim bynta ban ai khublei khatduh ïa u ne u nongïalam ba la pynneh pynsah ïa ka nam bad ka burom ha ka jingtreikam ka jong u kum u shakri paidbah.
Ha kane ka sngi la donlang u Lamphang ka Ïingdorbar Thaw Aiñ ka jylla u Thomas A Sangma, u Deputy Speaker Thomas D Shira, MLA, Mendipathar, Marthon J Sangma, MLA Songsak, u Mukul M Sangma, ki MLA, MDC nalor kiwei kiwei.
La buh ruh ïa ki syntiew na ka bynta jong u Lat ka jylla u C H Vijayashankar. Nangta ïa ka Lama ka Ri halor ka synduk bad hadien pat la aiti noh sha u khun jong u Late S C Marak u Silman K Sangma bad la tep hapoh u lum jingtep kaba don ha Gajingpara.
