Ban biang ka Constituency markhmat bad u CM leit kynduh u MLA Mawhati ryngkat ki nongïalam

Shillong, Nailar 17 : U MLA ka Mawhati Bah Charles Marngar ryngkat bad ki Nongialam na ka Mawhati Constituency, ha ka sngi Thohdieng ki la leit iakynduh ia u Myntri Rangbah ka Jylla Conrad K Sangma ha iing sah jong u ha Shillong ban dawa ia ki katto katne ki mat kam pynroi hapoh ka constituency.
Kine ki mat jingdawa ki kynthup ban pynioh ia ka Mawhati Community & Rural Development Block, nangta ia ka Umsning Jagi road (intermediate lane) ba dang sah na Sonidan sha Umsiang ban pyn iasoh ia ka Umsiang Jagiroad.
Ha ka jingiakren u MLA u la pyntip ruh ba ki don bun ki shnong bym pat don skul bad ki Ïing skul ha ki thain khappud kiba don kumba 7 tylli.
La ia kren ruh haba iadei bad kiwei ki surok kiba don ha ka thup jong ka PMGSY Phase -III ba kynthup ia ka surok Mawrong ba 17km,
ka surok Pamlatar ba 8 km, ka surok sha Lymphuid ba 16 km, bad ka surok na Mawlasnai sha Kdohhati ba don 20km bad kiwei kiwei ki surok.
U Bah Charles kum u MLA u la kyntu ruh ban kyntiew kyrdan noh ia ka Mawrong Sub Center bad Sonidan Sub center sha ka PHC nalor kiwei kiwei ki kam pynroi ha Mawhati Constituency.
Na ka liang u Bah Charles u la iathuh ba halor kine ki jing dawa na ka liang u Myntri Rangbah u la pyntikna ia u MLA ba ka C&RD Block un sa pynbna noh shen.
La iathuh ruh ba na ka bynta ka surok Umsning Jagi Road na Sonidan sha Umsiang u la pyntikna ba la mang pisa bad yn sdang trei noh ha u bnai ba ar ka snem 2025.
Haba iadei pat bad ki skul ba don ha ki thain khappud, la iathuh ba u Myntri Rangbah u la pyntip ba un sa ai noh shen ia ki work order na bynta kine ki skul.