Jowai, Jymmang 29: Ïa ka lympung ïalehkai ba lai jong ka ‘7-Aside Knock Out Football Tournament 2022’ bala pynlong da ka ‘Sports & Games Committee’ jong ka shnong Panaliar Jowai, la pynhap pyrda hynnin ka sngi 28 tarik ha ka jingïakhun phainal kaba la long hapdeng ka We Sport FC pyrshah ïa ka Elang Ki Oo FC.
Hashwa kane la don ka jingïalang ba lyngkot ba la pynïaid da u Waheh Shnong Panaliar, ma Riquoma Rq. Laloo bad la ïoh ka jingduwai ainguh da u ma Lamyooki Shullai. U Waheh shnong ula pynsngew ba ka shnong naduh ki por mynshwa kala ju pynlong ïa ka jingïalehkai phutbol kaba long mar 9 (khyndai) ngut shilliang ba la wan ïashim bynta na kylleng ki jaka.
Hadien kata ka shnong kala sdang ïa ka “Tiger 7” ka jingïakhun ba mar 7 (hynñiew) ngut shilliang, hynrei ha kane ka kynti ka shnong kala lah ban pynlong da ka 7-Aside Knock Out Football Tournament kaba la ïaid lynti la 3 snem mynta.
Ha kane ka sngi la wan ban pynhap pyrda ïa katei ka jingïalehkai phutbol da u Kongsan, ma Saron Pasweth uba dei ruh u MDC ka Jowai South Constituency, uba la kyntu ïa ki rang ïalehkai ba kin pyndonkam hok ïa ka sap ka phong ïalehkai kaba ki don, da ka da kyntu ïa ki nongjop ba kin nang bteng ban ïalehkai bha bad kumjuh ïa kiba shah rem ba kin nangïai treisitom ha ki sngi ban wan.
Haba phai sha ka jingïakhun kala long kaba itynnad bah namar haduh ba kut jong ka jingïakhun ym shem la don kiba thep kol tad haduh ba hap ban pynïakhun noh da ka (Tie Breaker) ha kaba ka kynhun Elang Ki oo FC kala long kum ka lahduh jong kane ka lympung mynta ka snem.
Ïa ka nam Man of the Match la ïoh rah da u Felickson Pasleiñ jong ka We Sport FC, katwa ïa ka naam Best Goal Keep la ïoh rah da u Confirm Bang ka Mency FC.
