Guwahati, Nailar 07 : U Myntri Rangbah ka Meghalaya, Conrad K Sangma, ha ka sngi Balang u la plie paidbah ia ka auditorium jong ka The Assam Royal Global University.
Ka skulbah ka la pynwandur ia kane ka jaka pule da ki kor kiba thymmai, kiba thymmai tam ban pynsuk ia ka jinghikai bad jingpule digital katkum ki kyndon jong ka NEP 2020.
Da kaba iaroh ia katei ka sienjam ba la shim da ka Assam Royal Global University, ba ka lah ban shna ia katei ka auditorium kaba paka kaba lah ban ngiam haduh 350 ngut, u Myntri Rangbah ka Meghalaya u la kyntu ruh ia ki samla pule kumjuh ia ki nonghikai ba kin pynjur shuh shuh ki jingwad bniah bad ki jingshem ba thymmai kiban weng ia ki jingeh jong ka thaiñ shatei lam-mihngi jong ka Ri.
U Conrad u la ong ruh ba mynta ka dei ha ki samla pule jong ka skulbah ban pyndonkam hok ia kane ka jingtei na ka bynta ban pynjanai shuh shuh ia ka jingnang jingstad ban pynlong ia ka University kaba pawnam ha ka pyrthei.
Haba pdiang burom ia u Myntri Rangbah ka Meghalaya, u Chancellor ka RGU u Dr. A.K Pansari u la iathuh ka jingpyrshang jong ka University ban pynmyntoi ia ka jingstad jong ki samla kane ka thaiñ shatei lammihngi sha kiwei ki bynta jong ka ri India bad shabar ruh.
U la pynpaw ruh ia ka jingkyrmen ba ka jingtei ba thymmai na bynta ka skulbah kan pynurlong pura ia ka jingangnud kiba bun ban ioh ia ki jaka hikai kiba paka tam katkum ka juk stad mynta.
U Dr. A.K Pansari u la pynpaw ia ka jingsngewnguh kaba khraw ia u myntri rangbah ka jylla Meghalaya uba la wan jngoh ia kane ka skulbah bad ai jingkren ruh ia ki samla pule.
