Nalor 215 kiba ïap, jah rngai sa 206 ngut ki briew na jingsyllad ka mariang ha Wayanad: CM Kerala

Thiruvananthapuram, Nailar 03 : U Myntri Rangbah ka Kerala, u Pinarayi Vijayan ha ka sngi Saitjaiñ u la ong ba ka jingwad bad ka jingleit pyllait im ïa ki lanot kiba shah ktah ha ka jingsyllad ki bor ka mariang ha Wayanad ka dang ïaid shaid shaid naba ki dang don sa kumba 206 ngut ki briew kiba dang jah.
U Myntri Rangbah u la ong ruh ba ka long kaba jynjar haduh katta katta ban wad ïa ki met ïap bad don ki khep ba ki lap na ki bynta jong ka wahbah Chaliyar.
“Kumba long haduh mynta, la lap haduh 215 tylli ki met ïap bad kine ki kynthup ïa ka metïap jong ki 87 ngut ki longkmie, 98 ngut ki shynrang bad ka met jong ki 30 ngut ki khynnah. Na kine kumba 148 tylli ki met ïap la dep ban aiti sha ki bahaiing ha sem tangba ki don pat sa 206 ngut kiba dang jah,” u la ong.
Shuh shuh u la ïathuh ruh ba ki don ruh haduh kumba 81 ngut ki briew kiba la mynsaw jur bad mynta ki dang don ha ki jaka sumar ha kylleng kylleng.
U Myntri Rangbah u la pyntip ruh ba na kine, ki la don ruh haduh 67 tylli ki met ïap kiba ym pat lah ban ithuh bad kumta na ka liang ka shnong kin pyndep ïa ka jinglehniam kaba khatduh.
Nalorkata, u la ïathuh ba ka jingwad haduh mynta ka dang ïai bteng kynthup ïa ka jingïarap jong ki 1419 ngut na ka Fire Force, NDRF, Forest Department, Police, Indian Army bad ki nongïarap mon sngewbha na Tamil Nadu.
Shuh shuh u la ïathuh ruh ki don ruh ki kynhun na ka K-9 bad na ka Tamil Nadu Medical Team kiba wan ban ïarap lang. Katkum ka jingïathuh jong u, la pyndonkam ruh da ki kor ki bor kum ka Human Rescue Radar bad ruh ki drone ban ïarap ha katei ka jingwad.
Haba kren pat halor ka jaka ban pynkynrïah noh ïa kitei ki lanot, u Myntri Rangbah u ong ba kin sa peit da ka jaka kaba shngaiñ bad kin sa shna ruh da ki kynja nongrit.
U la ïathuh ruh ba na ka liang u Myntri ka tnad Pule Puthi un sa leit ban jurip ïa ki skul kiba shah pynjulor ha katei ka thaiñ bad ban pyntikna ba ka pule puthi jong ki khynnah skul kan ym shah pyndik. La ïathuh ruh ba ha Chooralmala ki la don haduh 866 ngut ki heh pulit kiba lamkhmat ïa katei ka jingwad ïa kiba dang jah.
“Ki Fire and Rescue Services ki la trei borbah bha bad ki don ka bynta kaba kyrpang bha ban pyllait im ïa kumba 1000 ngut ki briew da kaba pyndonkam da ka jingkieng ba shu sdien bad ruh da ki jingkieng ba shu shna shipor. Ka Uralungal Labour Contract Cooperative Society ka la trei borbah bha da kaba shna ïa ki jaka hiar ki helicopter bad kumjuh ban pynbiang ïa ka bam,” u la ong.
Shuh shuh u pyntip ruh ba ki la don ruh bun ki jingjïa twa khyndew ha kane ka taiew kum ha Vilangad hajan Vadakara kaba ha Kozhikode district, nangta ha Kochuthodukunnu, Panam, Valiyapanam, Paniyeri bad Muchankai kumjuh.
Lah ban kdew hangne ba katei ka jingsyllad ki bor ka mariang ka la jia ha ka 30tarik Naitung, 2024 ki la jia bun tylli ki jingtwa khyndew kum ha ka shnong Mundakkai, Chooralmala, bad Meppadi kaba hap ha Wayanad District, Kerala, India. Ka jingher u lapbah ka la long ruh ka dawbah ka jingtwa ki sharing lum bad tuid naphang kum ka umbam kaba khlain ryngkat ki maw bad ki khyndew ha lynti ïaid jong ka.