Wat hadien ba kynduh ia u CM, pat weng ki nongtrei SSA ia ka jingshong kyllaiñ myngor

Shillong, Nailar 01 : Ka kynhun ki nongtrei SSA ka jylla ha ka shatri jong ka All Meghalaya SSA Non-Teaching Staffs Association (AMSNSA) ki la rai ban ym pat weng ïa ka jingïakhih da kaba shong kyllaiñ myngor wat hadien ba ki la dep ban kynduh ïa u Myntri Rangbah ka Jylla, Conrad K Sangma ha ka janmiet Sngi Palei.
Haba kren bad ki lad pathai khubor hadien ka jingkynduh, ka President jong ka kynhun ka Kong Jenifeer Synrem ka la ong, “Haba ïadei bad ka jingïakhih da kaba shong kyllaiñ myngor kan ym pat kut katba ngim pat ïoh ïa ki jingdawa jongngi.”
Shwa kane, ka President ka la ong ba ha ka jingkynduh ïa u Myntri Rangbah ryngkat ka jingdonlang ki ophisar ka tnad, ki la ïoh ban pynsngew markhmat ïa ka jingdawa ban kyntiew sha ka 80 persen na ka tulop kaba ki ïoh mynta nalor ki ar tylli kiwei pat ki jingdawa.
La ïathuh ruh ba kum ka kynhun ki la ïakren ruh halor ka jingdon ki para dkhot ba trei ha katei ka kam kiba la shah kyntait noh ban shah kynthup lang ha katei ka thup. “Dei halor kane ka mat ba la rai ban thaw da ka komiti kaba yn khlieh da u Commissioner Secretary ka tnad Pule Puthi ka jylla bad ki dkhot kiba kynthup ïa u State Project Director SSA nalor kiwei kiwei,” ka la ong.
Ka President ka la ïathuh ruh ba katei ka komiti kan sa bishar bniah lut ïa ki jingtyrwa bad ki jingkyrpad kiba kum ka kynhun ka dawa, nangta ban pynduh noh ïa ka jingthmu ban shim tang mar shiteng ne shilliang na ka jingdon ki dkhot la ka long naduh ki cluster haduh ki block, ki district bad haduh ka state level.
Nangta ka la ïathuh ba kum ka kynhun ki hap ban phah noh kyrkieh ïa ki jingai jingmut sha u Myntri Rangbah. “Ngi la ïoh ruh ïa ka por ban shong bad u Commissioner Secretary ryngkat ki dkhot ha ka sngi Thohdieng bad hadien kane ngin sa phah ïa ki jingai jingmut sha ka Finance Department,” ka la ong.
Katkum ka jingïathuh jong ka, na ka liang ka kynhun kam kwah satia ba ka jingpynkiew tulop kan long tang 25 persen hynrei ki ïai ban beit ba ka jingpynkiew tulop kan dei beit 80 persen kumba ki la dawa.