Lum u MLA Mawhati da ka jingïalang ba iehnoh beiñ ka sorkar ha ka liang ka pule ka puthi ki paid Block II

Nongpoh, Nailar 01: Na ka daw ka jingshah iehnoh bein ki paid khappud ka thaiñ Block II ha ka sorkar Meghalaya khlem da phai khmat ban wan rah kino kino ki skul kiba kham biang na ka bynta ban kyntiew ïa ka pule ka puthi ki heprit, u MLA ka Mawhati Constituency u Bah Charles Marngar mynta ka sngi u la lum syndon da ka jingïalang paidbah ba ïa kren ne ïa thir halor kane ka jingeh jong ki samla pule ha katei ka thaiñ Khappud.
Ïa kane ka jingïalang paidbah la pynlong ha ka Shnong Umlaper, ha kaba la wan ban shim bynta naduh ki nongïalam shnong, ki nongïalam seng samla, ki kmie ki kpa, ki nonghikai bad kynthp ka jingdon lang u MLA, u Bah Charles Marngar.
La lum ruh ïa kane ka jingïalang, ka long shi bynta ban ïa kren ne ïa tai sani, halor ka jingshah iehnoh bein ki samla katei ka thaiñ, namar kumba long haduh mynta ym don satia kita ki skul sorkar ban ai jingnang jingstad ïa ki kynnah bad lait noh tang ki skul ba la shu seng da ki Shnong, ba ki shem jingeh ruh wat ban siew tulop bad teng teng ki nonghikai kim ju ioh thikna ïa ka tulop.
Ki shnong kiba la poi ah akne ka jingïalang ki kynthup naduh ka Shnong Umlaper, Ummat, Ummat-2, Pdengtleit, Umsder, Umhi bad kiwei ki shnong, ha kaba kum ki nongshong shnong ha khappud, ki la pynpaw ïa ka jingsngewkhia kaba jur ba ym don satia kata ka skul kaba biang ba la wan rah da ka sorkar bad lait noh ki skul shnong bad ki skul ba la pynïaid da ki Mission.
Lyngba jong kane ka jingïalang, ki la ïa kren halor shibun ki mat ki jura kiba la donkam ban kyntiew ïa ka pule ka puthi ha katei ka thain khappud bad kum ki paid nongshong shnong ruh ki la dawa na ka sorkar ba kan phai khmat lem ban wan rah da ki skul kiba bit ba biang.
Na ka liang u MLA ruh kumba la pynsngew da ki paidbah halor ka jingeh jongki, da ka jingbym don ki skul kiba bit ba biang, u la kular ïa ki paidbah ban rah ïa kane ka mat sha ka sorkar khamtam ban kyrshan tulop ïa ki nonghikai bad ruh ban pynioh ïa ki skul building kiba biang khnang ban lah ban kyntiew ïa ka pule ka puthi lada ka sorkar ka shim khia ban ai da ki skul kiba bit ba biang ha kitei ki shnong nongkyndong ka thain khappud ka Mehalaya bad ka Assam.