Shillong, Naitung 31 : Ki bor Synshar District ka East Khasi Hills ha ka sngi Balang, ka la hukum ban buh ïa ki Pulit ban pahara ha Lum Survey khnang ban pynthikna ba kan nym don ka jingthut ka shongsuk shongsaiñ ha ka sngi shong bishar ka ïing Bishar ha ka 19 tarik Nailar.
Kane ka rai ka dei kaba la shim hadien ka jingïalang bala pynïaid da ka Deputy Commissioner RM Kurbah kaba la ïashim bynta da u Superintendent of Police ka District, u CEO ka Shillong Contonment bad u President bad Secretary ka seng Hynniewtrep Youth Council (HYC).
“Ban pynthikna ba kam nym mih kano kano ka jingkulmar, ngi la bthah ïa u SP ban buh ïa kii pulit ha ka thaiñ tad hadien ba ka ïing Bishar ka la pynmih ïa ka hukum namar ka jingshong bishar ïa ka mukotduma kan long ha ka 19 tarik Nailar” ong ka kong Kurbah haba ïakren bad ki nongthoh khubor.
“Ngi la rai ban ap ïa ka hukum jong ka ïing Bishar bad ngin bud ïa kaei kaba ka bthah” kala ong.
Haba kylli halor ka kaiphod jong ka jingwan jurip ba pynlong ha ka 8 tarik Jymmang, ka Deputy Commissioner ka la pyntip ba u Defence Estate Officer ula pyntip ba nalor ki laingut (kiba la ujor sha Iing Bishar), ki don ruh kiwei, kiba sah beaiñ ha Lum Survey.
“Hynrei, naba ka ïing Bishar kala pynmih ïa ka stay order, ngi hap ban ap ïa ka hukum jong ka hadien ba dep shong bishar ha ka 19 tarik Nailur. Halor kane ka nongrim, u DEO un sa shim ïa ka rai” ula ong haba bynrap ba ka jaka kam dei satia jong ka Sorkar Jylla hynrei jong ki bor shipai.
Nalor kane, ka DC ka pyntip ba ki don palat 80-90 tylli ki ïing ha Lum Survey kat kum ka jingleit survey bala pynlong da u DEO. “Kine ki briew kila shong la shah ha kane ka jaka khlem ka jingbit. Ki dei kiba beaiñ bad kiba shong khlem jingbit” kala bynrap.
Ha kajuh ka por, u President ka HYC Roykupar Synrem ula ong ba ka Council kan ym banse ban shim ïa ki sienjam ba tyngeh lada kine ki nongshong beaiñ kim shah kyndang noh na Lum Survey hadien ka 19 tarik Nailar.
“Ka jinghiar jurip dang shen ka la sei madan ba bun ki briew ba sah ha kane ka jaka ki dei ki ba sah beaiñ. Ngin ap ïa ka hukum ban pynmih da ka ïing Bishar hadien ka 19 tarik Nailar. Hynrei, lada ym leh eiei ïa kine kiba sah beaiñ, ngin ym don lynti pat da kumwei hynrei ban leh eiei hi da kaba tyngeh” ula maham.
