Nongstoiñ, Jymmang 26: Naduh ba ka surok rong ba la shna da ka sorkar Meghalaya ka la poi tiap ha ka shnong Langpih, kaba dei ka jaka kaba dang don hapdeng ka jingbym pat lah ban ïapynbeit, ka sorkar ka la don ka jingthmu ban shna ruh ïa ka Sub Health Centre. Ha kine ki bnai ba la dep na ka liang ka sorkar ka la lah ban pynurlong bad ha kine ki sngi ka jingshna ïa katei ka Sub Health Centre ka la ïaid shait shait.
Haba phai ha ka jinglong jingman jong ka koit ka khiah ha katei ka thaiñ ka jaka sumar ka don kam ha jaka sumar ka dei kaba don kam eh, namar ba ka dei ka jaka kaba shit. U bah Swingly Samakha sordar barim ka shnong Langpih, u la ïathuh ba ïa ka nongrim ban shna ïa katei ka jaka sumar, la dep pynbit pynbiang nadong shadong bad mynta ka jingpyntrei ka la sdang ban ïaid shait shait bad la khmih lynti ba hapoh une u snem yn lah ban pyndep ban shna ïa katei ka jaka sumar.
Na ka liang ki paitbah nongshong shnong bad ki riew rangbah na katei ka thaiñ, ki la ong ba ki la ong ba ka jingïoh ïa katei ka Sub Health Centre ha katei ka shnong, ka la pynkmen shibun ïa ki nongshong shnong. Ki da khmih lynti ruh ba ynda katei ka jaka sumar ka la bit la biang bad ka la don ïa ki nongtrei, baroh kiba pang kiba shitom na katei ka thaiñ kin ïoh ka jingïarap ba kham kloi ha ka por ba ki donkam.
