Shillong, Naitung 29: U Secretary ka Parliamentary Party jong ka VPP, u Bah HS Kharpran, u la phah da ka shithi sha u Speaker jong ka Meghalaya Legislative Assembly, u Thomas Sangma ban pynshai ha kaba ïadei bad ka Post jong u Nongïalam ka Liang Pyrshah ne u Leader of Opposition ba bat da u Bah Ronnie V. Lyngdoh.
Ha kane ka shithi u Bah Kharpran, u la ong ba ka Party ka pynpaw ka jingsngewsih ïa ka jingïai mih khubor da kaba pynïasnoh lang ïa ka VPP ha kaba ïadei bad ka jingthung ïa u Nongïalam ka Liang Pyrshah.
U MLA ka Mawryngkneng, u la pynshai ba ka Party kam ïadon bynta eiei ruh em bad ka jingthung u Speaker ïa u Nongïalam ka Liang Pyrshah. U la ong ruh ba ka jingkyrshan u President ka Party, u Bah Ardent Miller Basaïawmoit ïa u Saleng A Sangma ban long kum u Chief Whip ka Liang Pyrshah ym dei ban shim ba kadei ka jingkyrshan ruh na ka bynta ka shuki Nongïalam Liang Pyrshah namar kam don jingïadei eiei ruh, namar ba u Bah Ardent u la kyrshan ïa u Saleng kum u MLA ne u la ai ka jingkyrshan kaba shimet jong u bad kam dei ka jingkyrsan da ka Party.
