Shillong, Naitung 29 : Ka Congress kaba don ha ka Liang Pyrshah ha Iing Dorbar Thawaiñ ka Jylla ka la kyntu ïa ki paidbah ba ki dei ban pynkhyllem noh ïa ka sorkar Meghalaya Democratic Alliance (MDA) ba ïalam da ka NPP da kaba kynnoh ba kam shym la lah satia ban ïakhun ïa ki jingeh kiba ïadei bad ka jingwan rung kyrthlep jong ki briew kiba nabar.
“Lada ka sorkar ka la khyllem, ngi don ïa ka lad (ban weng noh ïa ka). Namar kata, lada ka sorkar kam lah ban pynhun ïaphi, pynkhyllem noh ïa ka,” ong u President ka Congress ba dei ruh u MP barim ka Shillong, Bah Vincent H Pala lyngba ka phone na Delhi.
Da kaba kyntu ïa ki paidbah ban kiar na kaba shim ïa ka aiñ ha la ki jong ki kti, u Bah Pala u la ong, “Ka jingshim ïa ka aiñ ha la ki jong ki kti kam dei ka lad. Kumta lada ki briew ki sdang ban shim ïa ka aiñ ha la ki jong ki kti, ngi kum ka jylla ngin ym poi shano shano ruh.”
Kane ka jingkren jong u ka long hadien ba dang shen haduh 10 ngut ki dkhot jong ka seng Hynniewtrep National Youth Front (HNYF) ki la shah kem na ka daw ka jingsangeh bad phah biang ïa ki kali Assam kiba kit ïa ki nongwan jngohkai pyrthei sha Sohra bad Dawki kum ka dak ka jingpyrshah ïa ka jingbym lah jong ka sorkar ban pyntreikam ïa ka Meghalaya Residents Safety and Security Act (MRSSA), 2016 kaba dei ban peitngor ïa ka jingwan tuid khlem sangeh sha ka jylla.
Kumjuh ruh dang shen, ka kynhun jong ki 8 tylli ki kynhun kiba pyrshah ïa ka jingwan buhai shnong ki briew kiba nabar, ki la pynbna ïa ka rai jong ki ban ïarap ïa ka sorkar jylla ban pyntreikam ïa ka MRSSA, 2016 da kaba pynlong ïa ka jingtalasi kaba jur pyrshah ïa ki nongwan buh-ai shnong ki bym don kot don sla kiba biang.
U Bah Pala u la ong, “Lada ngi kwah ba ka imlang sahlang jong ngi kan long kaba jop, ngi dei ban burom ïa kiwei pat ki para briew. Ki don ki aiñ bapher bapher ban weng ïa ki jingeh jongngi khlem da pynkheiñ ïa ka hok jong kiwei pat ki briew.”
Nalorkata, u heh Congress u la ong ruh ba kam donkam satia ban pynshitom ïa ki nongwan jngohkai pyrthei kiba wan kai sha kane ka jylla. “Phi dei ban ïakhih pyrshah ïa ka sorkar ha ka jaka ban wanrah ïa ki jingeh ïa ki briew kiba wan jngoh ïa ka jylla.”
Ha kawei pat ka liang, u Bah Pala u la ong ba kane kam mut pat ba ka sorkar ka hap ban kohnguh kat ïa kaei kaba ki sengbhalang ki dawa.
“Lehse ka sorkar ka la pyndep la ka jong ka kamram bad lap ba ka MRSSA ka donkam ban da pynbha shwa. Ha ka jingshisha, ki (sengbhalang) ki la dei ban ïa syllok shwa bad ka sorkar ha ka jaka ba kin buh jingeh ïa ki paidbah kiba wan kai sha ka jylla,” u la ong.
Haba jubab halor ka jingdawa ba sahteng ban pyntreikam ïa ka Inner Line Permit (ILP) ha kane ka jylla Meghalaya, u Bah Pala u la ong ba ka Congress ka la leh ïa kaba donkam ban pynbor ïa ka Centre ba kan pyntreikam ïa ka ILP ha kane ka jylla. “Mynta, ka shong pura ha ka BJP kaba ïalam ïa ka NDA ha ka sorkar pdeng ban rai halor ka jingdawa ILP.”
