Nongstoiñ, Naitung 29: Ka Seng Hynñiewtrep Youths Council New Nongstoiñ unit, mynta ka sngi hapoh ka jingïalam u General Secretary u samla Willson Myrthong, ka la leit ban ïa kynduh ïa u Branch Manager Meghalaya Rural Bank Nongstoiñ branch, halor ka jingud jingnam jong ki paitbah ïa ka jingjakhlia jong ka bynta ka ba hapoh lane khrum. Ka seng ka leit buh jingthoh ban kyrpad ïa u Branch Manager ban phah pynkhuid noh. Kumjuh ban buh da jaka bren ñiut la ka long hapoh bank lane ha phyllaw jong ka bank, khnang ba ki paitbah nongwan donkam ha katei ka bank kin ïoh pyndonkam.
Kane ka jingjakhlia jong ka khrum jong ka bank ka la pyni saitmet haduh katta katta ban peit. Ka seng ka la pynpaw ruh ba ïoh lehse kan ktah ïa ka koit ka khiah jong briew. Kumta ka la kyrpad jur u branch manager ban leh kloi noh ban wanrah ïa ka khuid ka suba.
Na ka liang u Branch Manager u la kular ban leh ïa ka ba donkam bad ong ruh ka jingwan jong ka seng ka long ka ba dei por bha. Na ka liang ka seng ka ai khublei ba u la kloi ban kular.
Ka seng ka kyntu ruh ïa ki paidbah kiba la leit donkam ha katei ka bank, ba ki dei ba kin burom bad kiar na kaba bret pathar ïa ki jaboh, biah kwai klumar bad bret kum ki plastic kwai ki bilor um bad kiwei kiwei.
