SHILLONG, Naitung 29: Ka synjuk badminton jong ka East Khasi Hills District ka la lah ban pynlong ïa ka lympung badminton kaba lai sngi lynter kaba seisoh, ba la tip da ka ‘8th East Khasi Hills District Open Badminton Championship 2024’. ïa kane ka lympung la sdang naduh ka 25 tarik haduh ka 27 tarik mynta u Naitung, 2024 ha JN Indoor Stadium Polo, Shillong.
Khyndiat ha kaba ïadei bad kane ka lympung, ka jingthmu ka long ban pynshlur bad kyntiew ïa khynnah kiba don ïa ka sap ha kane ka jingïalehkai.
Ki la don haduh 124 ngut ki nongïashimbynta bad112 ki jingïalehkai ha ki kyrdan bapher bapher – naduh ka U-13 single, U-15 single bad double, U-17 single bad double, U-19 single bad kiwei kiwei.
La pynïaid ïa ka sngi plie da ka kong Pondora Rapsang President ka EKHDBA bad la plie pyrda da u Dr. C.O Rangad-Senior Vice President ka MSBA bad Adviser EKHDBA ryngkat ka jingdonlang jong ki dkhot jong ka synjuk. Katba ha ka sngi pynhap pyrda la pynïaid ïa ka prokram da u Bah K Pyrtuh-EC Member bad la wan kongsan da u Dr W.Kharshiing – President Meghalaya State Badminton Association ha ka jingïadonlang kiwei de kiba la shah khot sngewbha – ba kynthup ïa u Dr. C. O Rangad (Adviser EKHDBA), Antonio Lakiang Treasurer MSBA, bad ki dkhot nongkitkam ka EKHDBA.
ïa ka nam Youngest Participant ka la leit sha u heprit Ethaneal K.D Dkhar u ba dang hynñiew snem ba ïashimbynta ha ka kyrdan ïalehkai U-13 Boys Single.
Ha ka kyrdan U-13 Girls Single, ka Asem Chanu Shivani ka la khur ïa namlahduh, katba ka Lateisha Nongtraw ha ka kyrdan ba ar. U Haegan Diengdoh u la ïohrah ha ka Under-13 ki shynrang bad ïa ka kyrdan ba ar la khur da u Vivaan Thapa.
Ha ka U-15 Girls Single, la rah da ka Inriti Nongtraw katba ïa ka kyrdan ba ar da ka Anjalee Sharma. Ha ka kyrdan ïalehkai U-15 Girls Double, ka Inriti Nongtraw bad ka Lateisha Nongtraw ki la rah ïa ka namlahduh, nangta ka Rhema G Nongkhlaw bad ka Josie Hadem ki la wan kyrdan ba ar.
Ha ka U-15 Boys Single, ka namjop ka la leit sha u Gavin Kharbuki, katba u Amrit Singh u la wan kyrdan ba ar. Ha ka U-15 Boys Double, u Gavin Kharbuki & Amrit Singh ki la rah ïa ka namjop, katba u Haegen Diengdoh bad u Karlsten Diengdoh ki la wan ha ka kyrdan ba ar.
Ka Sneha Chettri ka la rah ha ka kyrdan U-17 Girls Single, katba ka Netania T Tariang ka la wan ba ar. Ha ka U-17 Boys Single, ïa ka namjop la rah da u Raynell Kharbuki, ïa ka kyrdan ba ar la khur da u Gavin Kharbuki.
Ha ka U-19 Girls Single ka Sneha Chettri ka la rah ïa ka jingjop katba ka Netania T Tariang ka la wan kyrdan ba ar. Ha ka U-19 Boys Single, la rah da u Raynell Kharbuki, katba u Pratham Majumdar u la wan ba ar.
Ha ka U-19 Mixed Double u Stephan Marweiñ bad ka Sneha Chettri ki la ïohrah ïa ka namjop, ha ka kyrdan ba ar la khur da u Pratham Majumdar bad ka Carlynda Nongbri.
Ha ka jingïakhun kiba la rangbah, ka Elsarica Umdor ka la rah ïa ka namlahduh, ka Sejjal Joshi ka la wan kyrdan ba ar. Na ki Shynrang la rah da u Gaurav K Singh, katba u Mewanpyntngen Shadap u la wan ba ar.
Ha ka jingïakhun shijur na ki shynrang la rah da u Stephan Marweiñ bad u Vivian W Laloo, u Porsuram Joshi bad u Subadonbor Pyngrope ki la wan kyrdan ba ar.
Ha ka Mixed Double, la rah da u Gaurav K Singh bad ka Sejjal Joshi, katba u Dwigbijoy Churchung bad ka Elsarica Umdor ki la wan ha ka kyrdan ba ar.
