Shillong, Naitung, 23: Ka Joint Directorate Quality Committee bad ka Quality & Patient Safety Division ha ka sngi Baar ka la pynkup burom ïa ki shlem ai jingsumar bapher bapher jong ka Sorkar kiba la noh ïa u synniang u bynhei sha u sup u thiar ban pynbiang ïa ki lad jingsumar kiba kham bha sha ki paidbah nongshong shnong.
Ha kane ka sngi, ka Ganesh Das Government Maternal and Child Health Hospital ka la ïoh pdiang ïa ka LaQshya Certification na ka bynta ka Operation Theater ka jong ka bad ka la ïoh pdiang ruh ïa ka khusnam kum ka jaka sumar ba paka tam jong ka district. Katto katne ki jaka sumar ba kynthup ïa ki Primary Health Centre bad ki Community Health Centre ki la ïoh pdiang ïa ka khusnam Kayakalp Award na ka bynta ki jingshakri bapaka ïa ki paidbah nongshong shnong jong ka jylla.
Ha kane jingsam ïa ki khusnam la sakhi lang da ka Myntri kaba khmih ïa ka tnat Koit ka Khiah ka Dr. Ampareen Lyngdoh kaba la long kum ka Kongsan ryngkat ka jingsakhi lang jong u Commissioner bad Secretary ka tnad ka koit ka khiah u Joram Beda bad kiwei kiwei.
