Mawkyrwat, ‘Naitung 23: U Nongmihkhmat jong ka Mawkyrwat Constituency, u bah Renikton Lyngdoh Tongkhar ha ryngkat u Executive Engineer jong ka PHE Mawkyrwat Division, u bah K. Nongbsaw ki la leit jurip ïa ki jingpyntrei ïa ka skhim umbam umdih lyngba ka Jal Jivan Mission ne ka JJM kaba dei hapoh jong ka Greater Mawkyrwat Combine Water Supply Scheme (GMCWSS) kaba kot ïa ka jingmang pisa kaba T. 60/- klur tam.
Lah ban kdew ba lyngba kane ka Greater Mawkyrwat Combine Water Supply Scheme ka don ïa ka jingthmu ban pynïoh umbam umdih na ka bynta ki 8 tylli ki skhnong, bad kumjuh ruh kawei pat ka skhim um ka dei jong ka Mawsaw Combine Water Supply Scheme kaba ka jingmang tyngka ba T. 18 klur tam na ka bynta ki 12 tylli ki shnong.
Namarkata, ha kane ka jingleit jurip la lap ba ki nongpyntrei ki la pyntrei shait shait la i kumba ka jingtrei ka la kot 70 percent ba ki la dep kata na ka bynta ka jaka pynlang um ne top-um ha shnong Mawten, kawei pat ha shnong Laitlawsnai bad ka Jack Well ka tyllong ban tan umbam umdih kaba don ha Phodsala Wahsiej, South West Khasi Hills District.
Haba kren sha ki lad pathai khubor, u bah Renikton Lyngdoh Tongkhar, Nongmihkhmat jong ka Mawkyrwat Constituency, u la ïaroh ïa ki ophisar jong ka PHE Mawkyrwat Division kumjuh ruh ïa ki nongpyntreikam kiba lah trei shitom ban pyndep kloi ïa kine ki jingtrei, bad ha kajuh ka por ula khmih lynti ba ha u bnai Nohprah 2024 lane bnai Lber 2025, la lah ban pyndep ïa kine ki jingtrei.
Ha kawei pat ka liang, u bah Renikton u la ong ba dang u don u dak jingkylli uba khraw ha khmat namar haduh mynta kane ka skhim umbam umdih lyngba ka JJM kam pat shai ba kan dang ai por ne em ïa ka jingtrei haduh ba ki kontraktor kin lah ban pyndep, lada jia ba JJM kan ai por, ki kontraktor kin nym khih khoh reh ïa ka jingsiew pisa lane ka bill lada jia ba ka Ministry kam ai por shuh ban trei, namar kan jia ka por ba ka sorkar jylla kan kit ïa ka jingkit kaba khia na ka bynta ki kontraktor.
Namarkata, u MLA u la kyntu ruh ïa ki nongpyntrei ba lada long kaba lah kin pyndep noh ha u bnai ‘Nailar, 2024 khnang ba na ka liang ka department kan lah ban siew khuid noh ïa ka pisa na ka bynta jong kito kiba la dep pyntrei bad khnang ba kan long ka jingkyrhu ïa ki paidbah.
Kiwei de kiba la ïadonlang ki long u SDO ka PHE Mawkyrwat Division, u bah I. Kharbudon ha ryngkat ki nongpyntrei ne contractor lem kiwei de ki Ophisar.
