Nongpoh, Naitung 23: U Bah Pynshngaiñlang N Syiem, Deputy Chief Executive Member ka KHDC mynta ka sngi u la hiar sha Ri Bhoi District, na ka bynta ban leit jurip ïa ka shnat treimam ka KHADC ha Nongpoh na ka bynta ban tip ïa ki jingduna bad ki jingdonkam ban pynbit pynbiang ïa katei ka shnat treikam khnang ba kan ai jingmyntoi ïa ki paidbah.
Haba jurip ïa kane ka shnat treikam u Dy. CEM ka KHDC, u la leit ban jurip ïa baroh ki ophis treikam bad kynthup ruh ka ïingkashari ka KHADC kaba u kham ban khia ba dei ban treikam janai na ka bynta ban ai ka jingbishar kaba hok ha kiba ïa dei bad ki kam mukotduma ki paidbah.
`Haba kren sha ki lad pathai khubor u Bah P.N Syiem, symbud CEM ka KHADC, u la ong ba kane ka jingwan jurip jong u, ïa kane ka shnat treikam ha Nongpoh, ka dei namar kum ka ïing ka dei ban tip ïa ki jingduna kiba don hapoh kane ka ophis treikam bad ka phang kaba hakhmat eh kaba u la kren ruh ka long ba ka jingdon katei ka ophis treikam ka dei ban ai jingmyntoi katkum ka jingdonkam jong ki paidbah.
“Kumba ïa ka ïingkashari yn pyntreikam ha man la ki district, ka thong kaba hakhmat eh ka long ban katei ka ïingkashari ka dei ban pyntreikam noh bad kumba long haduh mynta ki don haduh 300 tylli ki motkuduma ba dang hap ban ai jingbisar, kaba dang sahkut hadien ka jingpynkylla na ka IPC bad CRPC sha ka BNS bad BNSS” ong u Bah P.N Syiem kum u symbud CEM ka KHADC.
U la ïathuh ruh ba ha kane ka sngi u la jurip lut ïa ki bynta jong ka ophis treikam naduh ka tnad khlaw, ka tnad tax, ki jingtei bad kiwei kiba dang duna, bad ïa kane un sa rah sha ka EC jong ka KHADC ban ïa kren bad ban ïa phylliew jingmut, khnang ba ka jingdon kane ka ophis treikam ka KHADC ha Nongpoh ka long shisha kaba ai jingmyntoi ïa ki paidbah.
U Bah P.N Syiem u la bynrap ruh da kaba ong, ba ka KHADC ka dang ïaid shakhmat ban shim khia na ka bynta ban pynbit pynbiang ïa ki jingduna kiba don ha ki shnat treikam ka KHADC bad ka thong hi kalong ban wan rah ïa ka jingkylla ha ka roi ka par bad ha ki jingmyntoi ba dei ban ioh da u paidbah.
