Jowai, Naitung 22: Ka resol ki jingïalehkai ka lympung phutbol bala tip kum ka “4th U Adelbert Laloo Memorial Trophy” haka kyrdan 3rd Division Football Tournament 2024 bala pynïaid da ka West Jaiñtia District Sports Association (WJDSA) Jowai kaba la long hynne ka Lah Sngi U Blei (22 tarik, Naitung) ha madan ïalehkai – Kiang Nangbah Stadium Dongmihsngi, Jowai.
Ha kane ka lai tylli ki kynhun ki la khur ïa ka jingjop, ba kynthup ïa ka Luti Tuber Ialong, SC SC Nonglatem bad ka Mulang Ialong katba kawei ka jingïalehkai ka la kut ha ka jingïakhaid.
Ha ka jingïakhun kaba nyngkong ka kynhun ïalehkai jong ka Luti Tuber Ialong kala lah ban pynliem da ka said da tang 1-0 kol ïa ka Loomiongkjam, bad ïa kane ka namtam na ka Luti Tuber Ialong la thep da u Francis Pale haka minit ba 37.
Ha ka jingïalehkai kaba bud la sakhi ïa ka SC SC Nonglatem kaba la pynliem noh da 2-0 kol ïa ka Dongneiñ Mookaswan.
U P. Langshiang u la lamlynti ïa ka kynhun da kaba sdang pynkhihjar haka minit ba 65 shuwa ba u Obidien Pyrtuh un thep ïa ka kol kaba ar (67 minit) ban pynthikna ïa ka namjop.
Katba ka jingïakhun hapdeng ka Phramer pyrshah ïa ka Khliehshnong Ialong ka la kut ha ka jingïakhaid hadien ba baroh ar kynhun ki la ïoh ban thep mar shi kol (1-1).
Na ka Phramer la thep da u Rashmiki Suchiang (8 minit), hynrei la pynïakhaid noh da u S. Pale haka minit ba 20 na bynta ka Khliehshnong ïalong.
Ha ka jingïakhun kaba khadduh la sakhi ïa ka Mulang Ialong kaba la pynliem noh da 2-0 kol ïa ka Saiñdur Mihmyntdu. Ka kynhun ka la ïoh pynkhihjar nyngkong lyngba u Poisuk Dhar haka minit ba 55 nangta bud sa ka kol na u Richard Dhar haka minit ba 56.
