Shillong, Naitung 21: Shi sngi shuwa ban sdang ka dorbar mang tyngka 2024-2025 jong ïing dorbar Lok Sabha kaba 18 ka sorkar khot ïa ka jingïalang ïa baroh ki nongïalam seng saiñ pyrthei hapoh ki ar tylli ki ïing dorbar, Lok Sabha bad Rajya Sabha.
Ïa kane ka jingïalang jong ki nongïalam jong ki seng saiñ pyrthei hapoh ki ïing dorbar la pynïaid da u Myntri Ïada ri u Rajnat Singh bad kane ka dei ka jingïalang kaba nyngkong jong ki nongïalam hapoh ki ïing dorbar ha kaba 18 kaba la pdiang burom ïa ki baroh.
Ha ka jingkren ban plie ïa ka jingïalang u Myntri ba dei peit ïa ka Parliamentary Affairs u Kiren Rijiju la ong ba ka dorbar mang tyngka kan sdang ha ka 22/Naitung/2024 bad kan kut ha ka 12/Nailar/2024, ka dorbar kan ïa shong 12 sien ha ki 22 sngi bad ka jingïakren kaba bun kan long halor ka mang tyngka 2024-2025.
Ïa ka mang tyngka yn wan rah hapoh Lok Sabha ha ka 23/ Natiung/ 2024 ha kine jingïashong dorbar kin don ruh kiwei ki kam kiba ka ïing dorbar kan ïakren, kum ka mang tyngka ïa ka Union Territory jong ka Jammu bad Kashmir.
Ha kane ka jingïashong dorbar kin don ruh 6 tylli ki bill kiba ka sorkar kan sa wanrah bad kita kin long ka The Finance (No. 2) Bill, 2024, The Disaster Management, (Amendment) Bill, 2024, The Boilers Bill, 2024, The Bhartiya Vayuyan Vidheyak, 2024, The Coffee (Promotion and Development) Bill, 2024, The Rubber (Promotion and Development) Bill, 2024.
U Myntri ba dei peit ïa ka Parliamentary Affair, u la ong ba ka sorkar ka long kaba la kloi ban ïakren ïa kino kino ki bynta kiba long hapoh ki kyndon jong ki rule kiba la don ha kaba ïadei bad ka jingpynïaid ïa ka dorbar. Ha kane ka jingïalang la don lang ruh u Myntri ka Koit ka Khiah u Jagat Prakash Nadda, u Myntri khynnah u Arjun Ram Meghwal, u Myntri khynnah Dr. L. Murugan.
U Myntri Ïada ri u Rajnath Singh u la ai khublei ïa baroh ki nongïalam jong ki seng saiñ pyrthei kiba la wan ban ïa shim bynta ha kane ka jingïalang bad u kyntu ban bat ïa ka burom jong ka ïing bad ban ïakren katkum ki rule, na ki 41 tylli ki seng saiñ pyrthei kiba don ïa ki MP kiba la ïa poi ki long sanphew san ngut.
