Kumno ka sorkar kan jubab hakhmat ki paidbah ha ka electionn MLA 2023 namar kat shaba phai ki nongtrei jongka ki ud ïa ka jingbym ïoh tulop bad arear beit khamtam lei lei ki nonghikai kiba pli kiba hap beit ban ap ïa ka tulop da ki lai haduh san ne hynriew bnai ruh.
Hooid ka sorkar ka don hapdeng ka jinghiran pisa tyngka kumba la pynpaw na ka por sha ka por hynrei kaba lyngngoh ka long ïa kino kino ki prokram kiba ka kwah ban pyntreikam ym ju ïohi ba duna pisa hynrei da phai sha ka tulop ki nongtrei jongka ka pynpaw beit ba ym don pisa.
Na ka bynta ban pyntrei ïa ki projek bapher bapher naduh ki surok haduh kiwei kiwei ki kam pynroi pynpar ka sorkar ka shim da ka ram da ki spah bad hajar klur na ki tnad bei tyngka bad ka jingkylli ka long lano kan lah ban siew ïa ka ram ka shah ba ka la shim. Ha ka jingshisha haba ka lah ban shim ram na ka bynta kiwei kiwei ki kam ka la dei ban shim ruh da ka ram ba kan siew dep ïa ki tulop bad jingsiew ba dei ban siew naduh kiba trei ha ka kam hikai, kiba trei ha ka tnad ka koit ka khiah, ki nongtrei jong ki Board ne Corporation bad kumta ter ter.
Namar kynmaw sa tang khyndiat bnai ka sorkar MDA hapoh ka jingialam ka NPP ka hap ban leit sha ki paidbah ban leit kyrpad ïa ka vote ba kordor jongki, hynrei lada kam lah ban pynurlong shwa ïa kine kiba ka dei ban pyndep kan buh ïa ki nongïalam jongka ha ka jingeh kaba khraw ha ka election ban wan.
Ym lah ban len, kane ka sorkar MDA ka dei ka sorkar kaba la shah kynnoh naduh sor haduh nongkyndong ha kaba ïadei bad ka kam khaïi dewiong beaiñ. Ki MLA jongka im im peit peit ki nud ban kren ba da dei ka por long session ne dorbar ki MLA te hap ban sangeh ka khaïi dewiong hynrei tang shu kut ka dorbar la bteng beit. Kane ka pynpaw ba kim salia shuh wat haduh katne la shah kynnoh ruh. Ki la rben thlup la kum ka snieh kuratia. Naduh ki khynnah rit haduh ki rangbah ki ïohi pylleiñ pylleiñ ïa ka jingkhaïi dewiong beaiñ ha ki surok namar ki trok ki ïaid mon khlem jingsalia bad patiaw shuh ïa ki bor ka aiñ.
Uwei na ki briew jongka aiñ u la ong yn leh shuh kumno lada bat ïa ki trok ruh tang shiphang la poi ka phone call naduh nalor duh, lada ym bat ruh shah ther ha ki paidbah. Kiba leh ki dei kiba heh hynrei kiba shah kynnoh ki dei ki rit ki ria. Kane kan long ka issue kaba kongsan tam ïa kiwei ki party ha ka por election ba kin khyrwit beit na rynsan hynrei i kumba ym don jingpatiaw satia. Namar ki pyrkhat ban thied beit ïa ki paidbah da ka pisa.
Kynmaw kum ki paid nongthep vote kiba la don ka hok ban thep vote da puson bad buh ha ki jingduwai naduh mynta ban ym ngop ha ka pisa hynrei ban pynpaw da ki kam khnang ba kine ki lei sansnem kin kyndit bynriew. Namar lada jop shi jop kim patiaw shuh ïa ki paidbah namar ki tip ba ki tang shu pyndonkam da ka pisa ki la jop biang beit. Hynrei kumba ïa ka jylla la tip kum ka ri tip briew tip Blei to pyntreikam hok ia kane wat shah pynbiej bad shah ïalam ha ka pisa.
Kum ki nongtrei sorkar bad ki nonghikai ruh ki la dei ban kyndit bynriew ym ban shu ngop tang shu pynbiej ka sorkar namar khlem pep tang ban jop ïa ka election ka lah ban siew dep ïa ka tulop ne siew bun bnai hynrei kynmaw tang shu jop kajuh ka jingeh kin ïa kynduh ban ap biang da ki bnai lynter bad ban ïakhi pyrshah biang tang ban ïoh tulop. Ki nonghikai ki dei ki nongsaiñ dur ïa ka lawei jongka jylla namar lyngba jongki ki mih ki khun samla pule kiba tbit, hynrei tang shu shong shuki i kumba la klet ïa ki nonghikai wat tang ban burom ïa ki ruh imat ym long shuh.
Kynmaw kum ki myntri sorkar bad ki ophisar, phi kiew sha ki kyrdan ba shakliar dei lyngba ki nonghikai kumta kynmaw ban burom ïa ki da kaba pynsuk ïa ki ban ïoh noh ïa ka tulop man la u bnai ym ban hap ïakhih ban ïoh tulop. Namar lada ki hap ban ïakhih kiba shah ktah ki dei ki khynnah skul bad haba shah ktah ki khynnah skul hiar ka pule dangle ha ka jylla na kata ka daw ngim don shuh ki IAS, IFS, IPS kiba dang pass thymmai mynta la bun bun snem. Lada ka sorkar ka kwah ban kiew ka pule puthi ka dei ban phai khmat nyngkong eh sha ki nonghikai namar ma ki ki dei ki nongsaiñ dur ïa ka lawei jongka jylla.
