Jowai, Naitung, 12: Ka Jaiñtia Coordination Committee for Reservation Policy (JCCRP) kiba kynthup ïa ki saw seng JSU, JNC, JSM bad ka JYF na Jaiñtia Hills ha ryngkat bad ka Synjuk Waheh Shnong Ri Jañtia ba ïalam da u President u Bah A. Lipon ki la leit ban ai ïa ka dorkhas sha ka Expert Committee lyngba u Secretary Bah L. K Diengdoh ha kamram trei kam jong u ha Secretariat, Shillong.
Kane ka kynhun ka la pynsngew ba ki la shong pyrkhat sani bha bad ki riew rangbah na rilum Jaiñtia, ki riew shemphang ban ïatai ïa sani halor ka jingai jingmut sha ka Sorkar lane sha ka Expert Committee bad na ka liang ka kynhun ki la pynpaw ba hadien ka jingpyrkhat ba lah bun sien bad ka jingïalang paitbah ba ladep pynlong la mih tang kawei ka sur, kata, ban dawa 80% ïa baroh ki Khasi, Jaintia bad Garo ban ïakhun hajuh lyngba ka Open Competition.
Kine ki ar kynhun ki la pynpaw ba kim kwah ban pharia ïa ki lai tylli ki jaitbynriew hynrei ban pynïakhun beit 80 % khlem da phiah shuh 40% la 40 %.
