Shillong, Naitung 12: U Bah A. L Hek, Myntri ba khmih ïa ka tnat Fisheries, ka sorkar jylla u la leit ban ïashim bynta ha ka 2nd Fisheries Summer Meet, 2024 kaba la long ha Madurai, Tamil Nadu, ba la pynlong da ka tnat Fisheries, ka sorkar pdeng ha ryngkat bad u S. C. Sadhu, Secretary, Fisheries, bad u Bah A.L. Mawlong, Director ka Fisheries. Ïa kane ka prokram la sakhi da ka jingplie ïa ka e-inauguration jong ki project da u Rajiv Ranjan Singh, u Myntri ka sorkar pdeng u ba khmih ïa ka Fisheries, Animal Husbandry, bad Dairying, ha ka jingïadonlang u u Myntri khynnah uba khmih ïa ka Fisheries, bad kiwei pat ki myntri ki sorkar jylla bad kiwei ha kaba ïa ki project ha kylleng ka ri India kaba la bei tyngka da ka PMMSY ha kaba kane ka jingplie ïa ki 4 tylli ki project kiba shongdor kumba T. 57 lak jong ka Ri Bhoi District, ka Fish Kiosk ha Liarbang kaba dei jong u Bah Ronal Tado, Biofloc Pond kaba ha Mawkangi bad Mawïong, Sohbang jong u Bah Pyrkhatjngai Syngkli bad ka kong Manbhatiolin Kharmyndai, Indigenous Breeding Unit ha Lalumpam Marngar jong u Bah Gumbir Syiem.
Ha ka jingkren jong u, u Bah A.L.Hek, Myntri ka tnat Fisheries, ka sorkar Meghalaya, u la ïathuh ïa ka jingthmu ka sorkar jylla ban trei shitom ha ka ban pynneh ïa ki kam pynroi ha ki kam ri dohkha, da kaba ong ba kane ka la long ka bynta kaba khraw ban kyntiew ïa ka ïoh ka kot ka jylla.
Haba ïathuh ïa ki kam jong ka Meghalaya Fisheries Sector, u Bah A. L Hek u la ïathuh ba kane ka bynta ka la kiew wat la ka dang long ha ka rta kaba dang khyllung, da ka jingdon palat 35,000 ki nongri dohkha ha ka jaka kaba heh 4,500 hectare kiba don ki pung ri dohkha. U la banjur halor ka jingpynmih dohkha kaba 12.33% kaba la kiew na ka 4799 MT ha u snem 2011-12 sha ka 20,208 MT ha u 2023-24, ha kaba kane ka la long ka jingjop jong ka jylla bad ka sorkar pdeng, da ka jingithuh kaba kyrpang ïa ki nongri dohkha ha ka jylla.
Haba ong ba ka kam ri dohkha kam dei tang ban kyntiew ïa ka ïoh ka kot ïa ki longïing hynrei kadei ka riti dustur bad ka sawdong sawkun ha baroh ki liang, u Myntri u la pynpaw ïa ka jingkiew ka jingdon kiba bam dohkha sha ka 11 kilogram ha kine ki 5 snem ba la leit, ka la kiew da ki prokram kum ka Blue Revolution bad PMMSY. U la ïathuh ruh ïa ka jingdon ka jaka bynrap kaba 2,299 hectare lyngba kine ki scheme, ha ryngkat ka jingpyndonkam ïa ki kor technology kiba bha bad ki jingmyntoi ba la ïoh na ka jingpynmih ïa ki dohkha.
U la ong ba ka jylla Meghalaya ka la buh ka thong ban pynneh ïa ki jingleh kiba la kdew da ka Meghalaya State Aquaculture Mission bad ki jingpyrshang ban pynneh pynsah na ki dohkha ka jylla kiba la pynneh lyngba ki community-managed sanctuary bad ki jaka pynkha ne buh symbai dohkha.
U la banjur halor ka jingdonkam ka jingïarap pisa khnang ban lah kyntiew ïa ka kam ri dohkha.
Ha kaba khatduh u Myntri u la kyrpad jur ïa u Myntri ka Sorkar Pdeng bad ki ophisar ban pynsted ban mynjur bad ban mang ïa ki skhim ba la tyrwa da ka tnat Fisheries jong ka jylla Meghalaya kaba la aiti naduh ka Summer Meet ha u snem 2023 na ka bynta ka jingmyntoi jong ki nongri dohkha.
