Shillong, Jymmang, 26: Ki nongdie madan kiba don hapoh ka shatri jong ka Meghalaya & Greater Shillong Progressive Hawkers and Street Vendors Association (MGSPHSVA) ha ka sngi Palei ki la shim ïa ka rai ban sangeh noh shisyndon ban pyndonkam ïa ki plastik bad kajuh ka por ki la shim pat ïa ka rai ban pyndonkam noh da ki pla jain nangne shakhmat.
U General Secretary jong ka Seng, u Bah Shane Thabah ha ka jingïakren bad ki lad pathai khubor u la kyntu ïa ki nongthied jingthied ba ki dei ban rah hi la ki jong ki pla haba ki wan sha iew sha hat haba leit siew leit tda ha iewduh ne haba thied jingthied na ki nongdie madan namarba naduh kane ka sngi, ki nongdie madan kin ym song shuh ïa kino kino ki jingdie ha ki plastic.
