50 snem ka jingïoh jylla bapura ka Sorkar kan sa ïoh khusnam bamsap: Michael Kharsyntiew
Shillong, Jymmang, 26: U Bah Michael Kharsyntiew uwei na ki nongtrei mon sngewbha u la kynthoh ïa ka jinglong jingman jong ka jylla Meghalaya hapoh ka jingsynshar jong ka Sorkar Meghalaya Democratic Alliance (MDA).
“Ka sur jong ka Sorkar MDA kaba ong, “Meghalaya on the move” ka dei pynban kaba pynïohpang bad kaba pynlehraiñ. Haoid, ngin sa ïaid shakhmat ka lawei ba lehraiñ,” ong u Bah Kharsyntiew.
“Hadien 50 ka jingïoh jylla bapura, ka Sorkar ka la nang ïaid shakhmat ban ïoh ïa ka khusnam ba bamsap tam bad ka jylla ba sahdien tam ha ka ri. Kumno ïa ka jinglong bakyntang jong ka synshar paidbah lane wat ki Babu ba pawkhmat kin ong ka ‘ing ba don burom’ haba ka ingdorbar thawaiñ ka la mad ïa kum kane ka jingshah pynjah burom naduh kaba sdang,” la kynthoh u Bah Kharsyntiew.
“Ka pyrthei ka peit kai ïa ngi bad ka rkhie ïa ngi. Ka jingshisha ka longba u Engineer ka tnat PWD uba shah bynshet kam u ba dei ban long u nongsumar ba la siew bainong/uba tbit ban peit ïa kum kine ki projek ba kongsan-u long pynban ïalade kum u kyrtong jong ka Sorkar NPP uba dang don ha ka kam shakri bad kane ka long kaei kaei kaba pynlyngngoh bad ka bym burom ïa ka aiñ,” u la kynthoh bad bynrap, “kumno yn lah ban shu tei pop bad ban bret ïa ka jingkitkhlieh ha ka IIT Roorkee kum ka paralok ban don bynta ha ka kam bymman. Sngewbha wat pynlehraiñ shuh ïa ngi.”
“Ha kawei na ki interbiw kaba ar snem mynshwa, une u Enginner u la kren sha ki lad pathai khubor ba ka rukom shna ïa ka ingdorbar thawaiñ ba thymmai ka long kaba shan wat lada khie u jumai uba jur haduh 5 lane 6 Richter Scale, hynrei kumba ka paw wat ha ka jingshah lynshop ha u lapbah ka tnum pyllun ka la twa kat haduh ba ka la ktah ïa ka pla pisa jong ki nongsiew khajna bad ïa ka por ba kordor,” la kynthoh u Bah Kharsyntiew.
U la kynthoh ruh ba bun ki jingtrei kiba la shu trei torti kum ka ISBT, ka jingkieng Mawlai, ka jingkieng ha Dwar Ksuid bad bun kiwei kiwei. “Hato kine ki ophisar Sorkar ba la siew bainong da ka Sorkar ki shim jingkitkhlieh neem haba ki dei ma ki, kiba peit ngor, kiba mynjur ïa ki projek, ki jingpyndur, ka plan, ki skim bad wat haduh ban da aiti ïa ka syrnot ynda la pyndep ïa ka kam,” u la ong.