Shillong, Jymmang, 26: U Myntri ka Koit ka Khiah u James P.K Sangma ha ka sngi Palei u la plie paidbah ïa ka Biological Waste Management System, ka jaka sumar ba shiphew jingthiah ha Geriatric Ward bad ka P.S.A Oxygen Generation Plant ha Shillong Civil Hospital..
Ïa kane ka prokram ba la pynlong ha phyllaw jong ka Hospital la pynlong da ka ophis jong u Jt. Director of Health Services, Civil Hospital, Shillong.
U James PK Sangma haba kren ha kane ka sngi u la ïaroh ïa ka jingtrei shitom bad ka jinglen lade jong ki nongai jingsumar bad ïa ki nongtrei jong ka Civil Hospital ban pyntyllun ïa ki jingshakri jong kane ka Hospital haba sumar ïa ki nongpang wat hapdeng ki jingeh kiba bun.
Haba pynpaw ba ka Civil Hospital, Shillong ka la long ka hospital kaba la kham ïaid shakhmat napdeng kiwei pat ki Hospital kiba don ha ki District, u James u la ong ba ka jingplie paidbah ïa kine ki lai tylli ki jaka kiba don hapoh ka hospital kan long kum ka jingïaid shaphrang jong ka jylla Meghalaya ha kaba ai jingsumar.
U la ong ba kane kan long ka jingsdang ban wanrah ïa ki tiar ai jingsumar kiba katkum kane ka juk ha kane ka Hospital ban pynmyntoi ïa ki paidbah nongshong shnong jong ka jylla.
U Principal Secretary jong ka tnat ka Koit ka Khiah u Sampath Kumar u la ïaroh ïa ki sienjam jong kane ka Hospital ha ka jingïakhun thma pyrshah ïa u COVID-19 bad ïa ki jingshakri kiba ka hospital ka la ai.
U la ai mynsiem ïa ki nongtrei jong kane ka Hospital ba kin don ïa ka mynsiem ïaishah khnang ban wanrah ïa ki jingkylla ha ki sngi ki ban dang wan.
Haba pyntip ba ka Cancer Wing hapoh ka Hospital ka la sdang ban treikam pura, u Kumar u la ong ba kane baroh ka dei ka jingtrei shitom jong ki nongtrei bad ïa ka Civil Hospital, Shillong shisien ka sngi yn sa lah ban kyntiew kyrdan kum ka Super Specialty Hospital.
