Shillong, Jymmang, 26: Ki nongïalam jong ka Hynñiewtrep Youths’ Council (HYC) ha ka sngi Balang ki la pynsngew hakhmat u Lat ka Jylla u Satya Pal Malik da kaba kyntu ba un tuklar lem da kaba bthah ïa ka Sorkar Jylla ba kan ïarap ai jingkyrshan pisa ïa ki nongrep kiba la shah ktah ha ka jinglynshop jong ki bor ka mariang.
Ha ka jingïakren bad ki lad pathai khubor, u General Secretary ka HYC u Bah Roy Kupar Synrem u la ong ba ki bun bha ki nongrep hapoh ka jylla kiba la shah ktah ha ki jingwan lynshop ka bor mariang naduh u snem 2021 bad la ïoh jingtip ba ka tnat Agriculture ka la ai jingïarap pisa T.100 haduh T.500 ïa ki nongrep kiba la shah ktah.
“Ngi la kyntu ïa u Lat ka jylla ba un bthah ïa ka Sorkar Jylla ba kan pyntreikam noh ïa ka Minimum Support Price (MSP) na ka bynta ki mar rep ba la pynmih bad ïa ki mar khlaw khnang ban ai jingïarap pisa ïa ki nongrep kiba la shah ktah ha ka jingwan lynshop ki bor ka mariang,” ong u Bah Synrem.
U la ong ba ka Sorkar Meghalaya na ka por sha ka por ka la khlei ïa ki kular ban sa buh noh ïa ka dor jong ka Minimum Support Price (MSP) khnang ba ki nongrep kin ym shah khñiot, hynrei wat hapdeng ki jingkular ka Sorkar kam shym pat pyntreikam satia haduh mynta.
U la bynrap ba ka jingbym leh eiei na ka liang jong ka Sorkar ka la buh jingeh ïa ki nongrep jong ka jylla khamtam ha ka por ba ki la mad jingeh ha ka jingwan lynshop ka jingpang khlam COVID-19 kat haduh ba ki la hap ban shu die taddor ïa ki mar rep bad ki don ruh ki khep ba kim don lad shuh da kumwei pat kat haduh ba kin hap ban theh kai sharud ïa ki mar rep ha ki jaka iew na ka daw ka jingbym lah ban pynïaid iew ïa ki mar rep.
“Ngi la kyrpad ruh ïa u Lat ba un bthah ïa ka Sorkar Jylla ba kan pyntreikam ïa ka MSP khnang ban ïarap ïa ki nongrep haba ki pynïaid iew ïa ki mar rep khnang ban pynthikna ba kin ym mad ïa ka jingduhnong,” ula ong.
U Bah Synrem u la ïathuh ruh ba ka seng ka la pynsngew ha u Lat ba un bthah ïa ka Sorkar Jylla ba kan pyntreikam noh mardor ïa ka Meghalaya State Agricultural Produce and Livestock Marketing (Promotion and Facilitation) Act, 2020 ka ban tehlakam ïa ka jingpynïaid iew ïa ki mar rep na kawei ka jaka sha kawei pat bad kynthup ruh ka jingkhaii ïa ki mrad bamdoh hapoh ka jylla bad ha ka ri baroh kawei.
U la bynrap ba ka jingthmu jong kane ka Aiñ ka long ban ai laitluid ïa ki nongrep ba kin die ïa ki mar rep ba ki la rep shitom ha ka por kaba biang bad ban don ruh ka jaka buh kaba biang khnang ban wanrah ïa ka jingkhaii ïa ki mar rep ha ka dur kaba shai bad kumjuh ruh ba dor jong ki mar rep kan long katkum ki kyndon jong ka aiñ.
