Nongstoin, Jymmang 26: Ki nongshong shnong jong ka shnong Mawru-syiar kaba dei kawei na ki shnong kaba don ha ki thaiñ Nongstoiñ West Khasi Hills District ,ki la hap ban shu shong dum mynta la kumba shi bnai ei ei, namar ka jingduh noh jong u Transformer uba don ha katei ka shnong.
La ong ba namar ka jingbym don shuh ka jingshai bording, ka la pynlong ia ki khynnah skul ban shem jingeh ban pule kot, namar mynta ka eksamin shiteng snem ruh ka la jan. Ka jingktah ka long khamtam ia ki khynnah ba pule online, hynrei kaba kham sniew shuh shuh ka long ba ha katei ka shnong la kharoi shibun ki nongtuh kiba la ioh ia ka kabu kaba biang namar ka jingdum.
Haba iadei bad katei ka phang ka seng HNYM na ka tnad Mawrusyiar hapoh ka jingialam jong u bah Enborlin Jyrwa President, Boni Khlain Wanniang Secretary bad kiwei kiwei ki dkhot jong ka seng, kynthup lang ruh u bah Tailan Star Lyngkhoi President HNYM West Khasi Hills, ha ka sngi balang ki la leit ban ai da ka jingthoh ha u bah S. Mawblei Assistant Executive Engineer Nongstoiñ Division MeSEB.
U bah Enborlin Jyrwa President, u la ong ba ka jingduh noh ia ka bording jingshai ka la pynduh nong jur ia ki paid nongshong shnong jong ka shnong, nalor ba ki khynnah pule ki la shem jingeh kiwei kiwei ki jingsniew ruh ki la kharoi, ha kaba wat ka dukan jong u ruh ka la shah pied ha ki runar, namar ki ioh ka kabu kaba biang palat.
